ევროკავშირის მხარდაჭერით ახალქალაქში სოფლის განვითარების პროექტი იწყება

პრეზენტაციას საქართველოში ევროკავშირის დელეგაციის წარმომადგენლები, საქართველოს სოფლის მეურნეობის სამინისტროსა და ახალქალაქის მუნიციპალიტეტის თანამშრომლები, ასევე, კერძო, არასამთავრობო და საჯარო სექტორის წარმომადგენლები და ახალქალაქის მცხოვრებლები (რომლებიც პროექტის პოტენციურ ბენეფიციარებად მოიაზრებიან) დაესწრებიან.

პროექტს „სოფლის განვითარების ახალი მიდგომის ხელშეწყობა ახალქალაქში“, საქართველოს საზოგადოებრივ საქმეთა ინსტიტუტის სოფლის მეურნეობის განვითარების დეპარტამენტი (GRDD/GIPA), ევროკავშირის მხარდაჭერით ახორციელებს. პროექტის პარტნიორები არიან მერსი ქორფსი, ELVA საზოგადოებრივი ჩართულობა და დასავლეთ კორკის განვითარების პარტნიორობა.

პროექტის მიზანია ქვემოდან ზემოთ მიმართული, ინკლუზიური გადაწყვეტილებების დანერგვა, რომელიც ახალქალაქის თემებისა და ადგილობრივ ჯგუფების სრულ ჩართულობას ითვალისწინებს. განსაკუთრებული აქცენტი ქალებსა და ახალგაზრდებზე გაკეთდება.

პროექტის ფარგლებში, კერძო, საჯარო და სამოქალაქო სექტორის წარმომადგენლები ადგილობრივი განვითარების ჯგუფებს (LAG) შექმნიან. ეს ჯგუფები მუნიციპალიტეტის შესაძლებლობებისა და გამოწვევების გაანალიზების საფუძველზე, სოფლების განვითარების პრიორიტეტებს განსაზღვრავენ და ადგილობრივი განვითარების სტრატეგიას შეიმუშავებენ. ადგილობრივი სტრატეგიით განსაზღვრული პრიორიტეტების შესაბამისად, ადგილობრივი ჯგუფი კონკურსის წესით აირჩევს და დააფინანსებს ადგილობრივი განვითარების პროექტებს. საგრანტო კონკურსში მონაწილეობას ნებისმიერი მსურველი შეძლებს. ეს შესაძლებელია იყოს ფიზიკური პირი, იურიდიული პირი, ინდმეწარმე, ორგანიზაცია, საინიციატივო ჯგუფი თუ სხვა. საგრანტო კონკურსისთვის ახალქალაქის რაიონში გამოყოფილია, დაახლოებით, 1 მილიონი ევრო.

ევროკავშირი ხელს უწყობს, სოფლად სიღარიბის შემცირებასა და სოფლის განვითარების თანამედროვე პრაქტიკის დანერგვას საქართველოში, სოფლისა და სოფლის მეურნეობის განვითარების ევროპის სამეზობლო პროგრამის (ENPARD) დახმარებით, რომელიც საქართველოში 2013 წლიდან ხორციელდება. 2013-2019 წლებისათვის სოფლისა და სოფლის მეურნეობის განვითარების ევროპის სამეზობლო პროგრამის (ENPARD) ბიუჯეტი საქართველოში 102 მილიონ ევროს შეადგენს. პროგრამის პირველი ფაზის პრიორიტეტი სოფლის მეურნეობის განვითარების ხელშეწყობა იყო, ხოლო მეორე ფაზა მიზნად ისახავს სოფლად მცხოვრები ადამიანების ეკონომიკური განვითარების შესაძლებლობების გაზრდას.

[sknews.ge]