27 წელი ომიდან – ახალციხეში აფხაზეთის ომის გმირები გაიხსენეს

ახალციხის ცენტრალურ პარკში, დაღუპულთა მემორიალი ომის მონაწილეებმა და ადგილობრივი თვითმმართველობის წარმომადგენლებმა ყვავილებით შეამკეს და სანთლები დაანთეს. ივლიტის ღვთისმშობლის შობის ტაძრის წინამძღვარმა მამა იოანემ გარდაცვლილთა სულის მოსახსენიებელი პანაშვიდი გადაიხადა.

მემორიალთან ფოლკლორულმა ანსამბლმა „მესხეთმა“ საგალობლები შეასრულა. ღონისძიებაზე, ომში დაღუპული მეომრებისადმი მიძღვნილი ლექსი, სახალხო მთქმელმა ვასილ კვინცხაძემ წაიკითხა.



საქართველოს ტერიტორიული მთლიანობისთვის დაღუპული 14 მებრძოლის ოჯახს მუნიციპალიტეტის მერიამ ერთჯერადად 300 ლარი გადასცა. ფულადი დახმარება 2008 წლის რუსეთ–საქართველოს ომში დაღუპული ჯარისკაცების ოჯახებსაც გადასცეს..

აფხაზეთის ომმა, რომელიც 13 თვეს და 13 დღეს გაგრძელდა, სხვადასხვა მონაცემით, 10 ათასიდან 30 ათასამდე სამხედრო და სამოქალაქო პირის სიცოცხლე შეიწირა. დევნილად იქცა 300 ათასამდე ადამიანი.
აფხაზეთის ომი 1992 წლის 14 აგვისტოს დაიწყო. 1992–1993 წლებში ომში სამცხე–ჯავახეთიდან 800–ზე მეტი ადამიანი წავიდა. 16 მებრძოლი დაიღუპა, მათ შორის: 4 ადიგენის, 8 ახალციხის, 2–2 კი ასპინძის და ბორჯომის მუნიციპალიტეტებიდან იყო. აფხაზეთის ომში რეგიონიდან 14 ჯარისკაცი დაიჭრა.

რობი ზარიძე,ახალციხე