28 წელი აფხაზეთის ომიდან – ახალციხეში გმირები გაიხსენეს

ღონისძიება ახალციხის ცენტრალურ პარკში, ომში დაღუპულთა მემორიალთან გაიმართა. ადგილზე ამაღლების სახელობის ტაძრის წინამძღვარმა, ნიკოლოზ აბრამაშვილმა გარდაცვლილთა სულის მოსახსენიებელი პანაშვიდი გადაიხადა.

საქართველოს ტერიტორიული მთლიანობისთვის დაღუპული 14 მებრძოლის ოჯახს, მუნიციპალიტეტის მერიამ, ერთჯერადად 300 ლარი გადასცა. ფულადი დახმარება 2008 წლის რუსეთ–საქართველოს ომში დაღუპული ჯარისკაცების ოჯახებსაც გადასცეს.

აფხაზეთის ომი 1992 წლის 14 აგვისტოს დაიწყო. 1992–1993 წლებში ომში სამცხე–ჯავახეთიდან 800–ზე მეტი ადამიანი წავიდა. 16 მებრძოლი დაიღუპა, მათ შორის: 4 ადიგენის, 8 ახალციხის, 2–2 კი ასპინძის და ბორჯომის მუნიციპალიტეტებიდან იყო. აფხაზეთის ომში რეგიონიდან 14 ჯარისკაცი დაიჭრა.

ომმა, რომელიც 13 თვეს და 13 დღეს გაგრძელდა, სხვადასხვა მონაცემით, 10 ათასიდან 30 ათასამდე სამხედრო და სამოქალაქო პირის სიცოცხლე შეიწირა. დევნილად იქცა 300 ათასამდე ადამიანი.

[რობი ზარიძე]