ახალციხეში აფხაზეთის ომში დაღუპული მეომრები გაიხსენეს

დღეს, 14 აგვისტოს აფხაზეთის ომის დაწყებიდან 24 წელი გავიდა.

საქართველოს ტერიტორიული მთლიანობისათვის დაღუპულ მებრძოლთა მემორიალთან ივლიტის ღვთისმშობლის შობის სახელობის ტაძრის წინამძღვარმა ომის დროს გარდაცვლილ გმირთა სახელზე პანაშვიდი გადაიხადა.

ქალაქის ცენტრალურ პარკში შეკრებილმა ადგილობრივი თვითმმართველოს წარმომადგენელებმა და მოქალაქეება ომში დაღუპული მებრძოლები გაიხსენეს და მათი მემორიალი გვირგვინით შეამკეს.

„დღეს ძალიან მძიმე დღეა. ახალციხიდან გვყავდა ისეთი მამულიშვილები, რომლებმაც თავი გაწირეს ქვეყნისთვის. მინდა ვთქვა, რომ არავის ღვაწლი არ იქნება დავიწყებული“,– განაცხადა ახალციხის ვიცე მერმა ილია ზარდაშვილმა.

სპეციალურად დღევანდელი დღისთვის ფოლკოლორულმა ანსამბლმა „მესხეთმა“ ომში დაღუპულ გმირების საპატივსაცემოდ სხვადასხვა საგალობლები შეასრულა. გარდა ამისა, სახალხო მთქმელმა ვასილ კვინცხაძემ მეომრებისთვის ლექსი წაიკითხა.

მერიის კულტურის სამსახურის ინიციატივით, აფხაზეთის ომში გარდაცვლილების ოჯახის წევრებს საჩუქრად პურის საცხობები გადასცეს. ახალციხის გამგეობამ კი, მუნიციპალიტეტის მასშტაბით 5 ოჯახს, რომელთა ოჯახის წევრები ომში დაიღუპნენ, 200–200 ლარი ჩაურიცხა.

შეგახსენებთ, რომ 1992–93 წლებში აფზახეთის ომში სამცხე–ჯავახეთის რეგიონიდან 16 მებრძოლი დაიღუპა მათ შორის: 4 ადიგენის, 8 ახალციხის, 2–2 კი ასპინძის და ბორჯომის მუნიციპალიტეტებიდან იყო. ომში მიღებული ჭრილობების გამო 14 ჯარისკაცი დაინვალიდდა.



[ვარლამ წიკლაური, ახალციხე]