25 წელი აფხაზეთის შეიარაღებული კონფლიქტიდან – ახალციხეში გმირები გაიხსენეს

დღეს, 14 აგვისტოს 25 წელი შესრულდა აფხაზეთში შეიარაღებული კონფლიქტის დაწყებიდან. ამ დღესთან დაკავშირებით, დილიდან, ახალციხის მერიისა და გამგეობის წარმომადგენლები, ახალციხის ცენტრალურ პარკში, საქართველოს ტერიტორიული მთლიანობისათვის დაღუპულთა მემორიალთან შეიკრიბნენ.

ივლიტის ღვთისმშობლის შობის სახელობის ტაძრის წინამძღვარმა მამა იოანემ გარდაცვლილებისთვის პანაშვიდი გადაიხადა. ადგილობრივი ხელისუფლების წარმომადგენლებმა კი მემორიალი გვირგვინებით შეამკეს.

როგორც ახალციხის მერმა განაცხადა, მერია, აფხაზეთის კონფლიქტის ექვს მონაწილეს ფულად თანხას გადაურიცხავს, ხუთს – 200, ერთს კი, რომელსაც მძიმე ჯანმრთელობის მდგომარეობა აქვს, 250 ლარის ოდენობით.

ახალციხის მერიას სხვა გეგმაც აქვს.

„ვგეგმავთ ობელისკის გაკეთებას, დაახლოებით 6000 ლარი გვაქვს გათვალისწინებული. უახლოეს საკრებულოს სხდომაზე გავიტანთ ამ თანხას დასამტკიცებლად“, – განაცხადა ახალციხის მერმა ვლადიმერ ზედგინიძემ.

ამ კონფლიქტთან დაკავშირებით გეგმები აქვს ახალციხის მუნიციპალიტეტის გამგეობასაც. გამგებლის ზაზა მელიქიძის განცხადებით, იმ სოფლებში, საიდნაც ქვეყნის ტერიტორიული მთლიანობისათვის გარდაცვლილები იყვნენ, მათი სახელობის სკვერების რეაბილიტაცია მიმდინარეობს.

შეგახსენებთ, დღეს 25 წელი გავიდა აფხაზეთში შეიარაღებული კონფლიქტის დაწყებიდან. საომარი მოქმედებების შედეგად, რომელმაც წელიწადზე მეტხანს გასტანა, არაოფიციალური მონაცემებით, დაიღუპა 16 ათასზე მეტი სამხედრო და სამოქალაქო პირი და დევნილად იქცა 300 ათასამდე ადამიანი

ვეტერანების საქმეთა სახელმწიფო სამსახურის სამცხე–ჯავახეთის სამმართველოს ინფორმაციით, 1992–93 წლებში აფხაზეთის ომში რეგიონიდან 800–მდე ადამიანი იბრძოდა. ომში სამცხე–ჯავახეთიდან 16 მებრძოლი გარდაიცვალა. მათ შორის:ოთხი ადიგენის, რვა ახალციხის, ორ–ორი კი ასპინძისა და ბორჯომის მუნიციპალიტეტებიდან იყო. ომში მიღებული ჭრილობების გამო 14 ჯარისკაცი დაინვალიდდა.

აფხაზეთში სამხედრო დაპირისპირება 1992 წლის 14 აგვისტოს დაიწყო და 13 თვე და 13 დღე გაგრძელდა. 1993 წლის 27 სექტემბერს კი სოხუმის დაცემითა და საქართველოს შეიარაღებული ძალების მარცხით დასრულდა.





[ლუბა გიორგაძე, ახალციხე]