სამცხე –ჯავახეთში აგვისტოს ომში დაღუპულთა მემორიალები ყვავილებით შეამკეს

ასპინძის მუნიციპალიტეტში, დღეს, 8 აგვისტოს ასპინძის მუნიციპალიტეტის მერმა და საკრებულოს თავმჯდომარემ აგვისტოს ომში დაღუპულ ტარიელ ქამაშიძეს სახელობის მემორიალთან სოფელ მირაშხანში ყვავილები მიიტანეს.



ყვავილებით შეამკეს ახალციხის თვითმმართველბის წარმომადგენლებთან ერთად სამხარეო ადმინისტრაციის წევრებმაც ახალციხეში ცენტრალურ პარკში საქართველოს ტერიტორიული მთლიანობისათვის დაღუპულთა მემორიალი. აქ ასევე, ივლიტის ღვთისმშობლის შობის ტაძრის წინამძღვარმა მამა იოანემ გარდაცვლილთა სულის მოსახსენიებელი პარაკლისი გადაიხადა.

„დღეს შესრულდა ათი წლის თავის 8 აგვისტოს ომის შემდეგ. ვუსამძიმრებ ყველას, ვისი ოჯახის წევრებიც შეეწირნენ ამ ბრძლას. როცა ქვეყანაში ომია და ამას ადამიანები ეწირებიან ეს ძალიან მტკივნეულია“, – ამბობს ახალციხის მერი ზაზა მელიქიძე.

მისივე თქმით, ახალციხეში ეტაპობრივად გაიხსნება დაღუპული გმირების სახელობის სკვერები: „ჩვენ უკვე გვაქვს რამოდენიმე სკვერი, რომელიც ომში დაღუპული გმირების სახელობისაა“.

მემორიალის შემკობის შემდეგ ახალციხის სამუსიკო სკოლაში დაღუპულთა ხსოვნისადმი მიძღვნილი საღამო გაიმართა. ღონისძიებაზე წუთიერი დუმილით პატივი მიაგეს გმირებს. ღონისძიებაში მონაწილეობა მიიღეს ანსამბლმა „მესხეთმა“ და ღვთისმშობლის შობის სახელობის მგალობელთა გუნდმა.



2008 წლის აგვისტოს ომიში თავდაცვის სამინისტროს 170 მომსახურე დაიღუპა, მათ შორის ექვსი სამცხე–ჯავახეთიდან იყო. ასევე, ომში დაიღუპა შინაგან საქმეთა სამინისტროს 14 თანამშრომელი და 224 სამოქალაქო პირი.

[მარიამ ბარძიმაძე, ახალციხე]