მომავალი პედაგოგები ინკლუზიური განათლებისთვის ემზადებიან

სპეციალური საგანმანათლებლო საჭიროების მქონე ბავშვთა განათლებისა და სტრატეგიული განვითარების გეგმებზე დაწყებითი განათლების სტუდენტებმა დღეს, 30 სექტემბერს სამცხე – ჯავახეთის სახელმწიფო უნივერსიტეტის მეორე კორპუსში ღია ლექციაზე იმსჯელეს.

სტუდენტები სამ ჯგუფად განაწილდნენ და „ტემპუსის“ პროგრამის ერთ – ერთი მონაწილის და პედაგოგიკის დოქტორის ირმა ქურდაძის დახმარებით, ის სტრატეგიები მოამზადეს, როგორ უნდა იმუშაოს პედაგოგმა ჰიპერაქტიულ ბავშვებთან.

„ინკლუზიური განათლება პრიორიტეტია, შესაბამისად, გავაკეთეთ რიგით მეორე პილოტირება, რაც ხელს უწყობს ყურდაღების დეფიციტებისა და ჰიპერაქტიურობის სინდრომის შესწავლას, მის დიაგნოსტიკას და სტრატეგიების მოფიქრებას. ეს სტრატეგია სპეციალური საგანმანათლებლო საჭიროების მქონე მოსწავლეებთან ინდივიდუალურ მუშაობას უწყობს ხელს“, – ამბობს ირმა ქურდაძე.

ღია ლექციას დიდი ბრიტანეთის, დრეზდენის და პოლონეთის უნივერსიტეტების პროფესორ – ექსპერტები ესწრებოდნენ, რომლებმაც სტუდენტების მიერ მომზადებული სტრადეგიები დადებითად შეაფასეს.

ლექციის დასასრულს სტუდენტებმა 15 წუთიანი ფილმი ნახეს, რომელიც ჰიპერაქტიულ ბავშვებთან ურთიერთობას ასახავდა.

სამცხე – ჯავახეთის სახელმწიფო უნივერსიტეტი საერთაშორისო „ტემპუსის“ პროექტს 2012 წლიდან ახორციელებს. აღნიშნული პროექტი ევროკავშირის მიერ ფინანსდება და ითვალისწინებს მომავალი მასწავლებლებისათვის საპილოტე კურსების მომზადებას სხვადასხვა მიმართულებით.

„აქტიურად ინერგება ინკლუზიური განათლება, ამ კუთხით კი სკოლებში უამრავი პრობლემა.მომავალმა პედაგოგმა თავიდანვე უნდა იცოდეს როგორ იმუშაოს სპეციალური საგანმანათლებლო საჭიროების მქონე ბავშვებთან, ზუსტად ამისთვის არის აღნიშნული პროგრამაც“, – ამბობს „ტემპუსის“ საერთაშორისო პროოექტების ინსტიტუციური მენეჯერი თინა გელაშვილი.

[მანანა სარაშვილი, ახალციხე]