ახალციხეში მულტილინგვური სწავლებისთვის ემზადებიან

”ტემპუსის” პროექტი, რომლის სახელწოდებაა ”მულტილინგვური მასწავლებლის მომზადების პროგრამა საქართველოსა და უკრაინის უნივერსიტეტებში” 2012 წლის 15 ოქტომბრიდან დაიწყო. მასში საქართველოს სამი უნივერსიტეტი, ივანე ჯავახიშვილის სახელობის თბილისის სახელმწიფო უნივერსიტეტი, ილიას სახელმწიფო უნივერსიტეტი და სამცხე-ჯავახეთის სახელმწიფო სასწავლო უნივერსიტეტია ჩართული. პროექტში ასევე უკრაინის სამი უნივერსიტეტი მონაწილეობს. ხოლო პროექტის პარტნიორები არიან ლიტვის, ლატვიისა და გერმანიის უნივერსიტეტები.

”პროექტის ფარგლებში რამდენიმე სამუშაო შეხვედრა და ტრენინგი უკვე ჩატარდა. ახლა მესამე შეხვედრა მიმდინარეობს, რომელიც გულისხმობს პროგრამაში ჩართული მასწავლებლების მომზადებას მულტილინგვური განათლების თეორიულ და პრაქტიკულ საკითხებში. პროგრამაში ჩართულ უნივერსიტეტებს სამომავლოდ მასწავლებელთა გადამზადების ისეთი პროგრამა გვექნება, რომელიც მათ საშუალებას მისცემს მინიმუმ ორ ენაზე ასწავლონ ესა თუ ის საგანი”, - განმარტავს ივანე ჯავახიშვილის სახელობის თბილისის სახელმწიფო უნივერსიტეტის ჰუმანიტარულ მეცნიერებათა ფაკულტეტის დეკანი და ”ტემპუსის” პროექტის კოორდინატორი დარეჯან თვალთვაძე.

პროექტის მონაწილეები ახალციხეში ხუთი დღის განმავლობაში იქნებიან. ორშაბათიდან პარასკევის ჩათვლით სხვადასხვა აქტივობები - ტრენინგები და სამუშაო შეხვედრებია დაგეგმილი.

”პროექტი საკმაოდ სოლიდური თანხით ფინანსდება, როგორც პარტნიორი, ჩვენს უნივერსიტეტს გარკვეული წილი გაგვაჩნია, ეს არის დაახლოებით 101 ათასი ლარი. რაც ყველაზე მნიშვნელოვანია, რადგან არც ერთ პარტნიორ უნივერსიტეტს იმხელა თანხა არ აქვს გამოყოფილი, რაც სამცხე-ჯავახეთის სახელმწიფო სასწავლო უნივერსიტეტს. უნდა იქნეს შეძენილი 42 ათასი ევროს ღირებულების მატერიალურ-ტექნიკური აღჭურვილობა, ასევე დაახლოებით 4 ათასი ევროს ღირებულების წიგნადი ფონდი, ასევე ფინანსდება გამოცემები და ბეჭვდითი პროდუქცია”, - ამბობს სამცხე-ჯავახეთის სახელმწიფო სასწავლო უნივერსიტეტის სრული პროფესორი და პროექტის თანამენეჯერი თინა გელაშვილი.

აღნიშნული პროექტი სამწლიანია და 2015 წლის 15 ოქტომბერს უნდა დასრულდეს. რის შემდეგაც, საბაკალავრო და სამაგისტრო დონეზე ბილინგვური სწავლების პროგრამა იქნება მზად, რომელიც აკრედიტაციას გაივლის და უმაღლეს სასწავლებლებში დაინერგება.

[თამარ თოთაძე, ახალციხე]