ახალციხეში ისტორიული აბანო განადგურების პირასაა [ფოტო]

თაბუკაშვილის N 90–ში მდებარე ისტორიული აბანო შპს „საქართველოს მელიორაციის“ ტერიტორიაზე მდებარეობს. აბანოს ირგვლივ კი საცხოვრებლი სახლები და ავტოფარეხებია. ერთგუმბათიან აბანოში ნაწილობრივ შენარჩუენბულია ძველი იერსახე. შენობაში თამაშირ–მუყაოს ფილებით გაკეთებულია ოთახი და მოწყობილია კიბე. ნესტის გამო კედლებიდან და თაღიდან აგური და ბათქაში ცვივა.

შენობა საქართველოს მელიორაციის ბალანსზე 2011-12 წლიდან ირიცხება. ორგანიზაციაში ამბობენ, რომ შენობა დაკეტილია და არაფერში იყენებენ.

„შენობაში სინესტე იმიტომაა, რომ გუმბათზე ტოლი დააფარეს და ნესტი შენობაში რჩება“, გვითხრა აბანოს გვერდით მცხოვრებმა სტასიკ ონუფრიადმა.

ოჯახი, რომელიც ისტორიულ შენობას სარეცხის გასაშრობად იყენებს, „სამხრეთის კარიბჭეს“ სახლში არ დახვდა, მეზობლები ამბობენ, რომ: „ამ საკითხით არავინ დაინტერესებულა და არც არავის გაუფრთხილებია ოჯახი, რომ იქ სარეცხი არ დაეფინა“.



ისტორიკოსების თქმით, შენობა მეცხრამეტე საუკუნეშია აშენებული.

„ასე ვიცით, მაგრამ ამას ვერსად ვერ წაიკითხავ და არსად არ წერია“, – გვითხრა ისტორიკოსმა და ახალციხის მუნიციპალიტეტის დეგლთა დაცვის განვითარების ხელმძღვანელმა, რეზო ანდღულაძემ.

ანდღულაძის მსგავსად, ისტორიკოსი ცირა მესხიშვილი აღნიშნავს, რომ აბანო არცერთ ისტორიულ წყაროში არაა მოსხენიებული: „აქ ქალაქური ტიპის დასახლება არ ყოფილა, ამ ტერიტორიაზე უფრო მეტად სასაფლაოები და ბაღები იყო გაშენებული“.

აბანო კულტურული მემკვიდრეობის სიაში შეტანილი არ არის. ძეგლთა დაცვის სააგენტოს დირექტორის ნიკოლოზ ანთიძის განმარტებით, სააგენტო იმ შემთხვევაში განიხილავს ამ საკითხს,თუ ვინმე განცხადებით მიმართავს.

„ამ შემთხვევაში ჩვენი თანამშრომლები ჩავლენ ადგილზე ნახავენ შენობას. შეამოწმებენ რა რა ღირებულებები აქვს, გაამზადებენ სააღრიცხვო ბარათს და განიხილავენ კომისიაზე. ამის შემდეგ გადაწყდება მიენიჭება თუ არა ძეგლის სტატუსი“, – გვითხრა ანთიძემ.

აბანო საბჭოთა კავშირის დროს „წყალთა მეურნებასა და მელიორაციას“ ეკუთვნოდა საწყობად იყენებდნენ.

ამავე თემაზე ნახეთ: ახალციხის აბანოები – ქალაქის დაკარგული ისტორია









[თორნიკე ზაზაძე, ახალციხე]