‘ისტორიულ აბანოებთან დაკავშირებით მესაკუთრესთან ხელშეკრულება გაფორმდება’ – ძეგლთა დაცვა

კულტურული მემკვიდრეობისა და ძეგლთა დაცვის სააგენტოს წარმომადგენლები შავაძეების სახლში აღმოჩენილი ისტორიული აბანოების შესწავლას 30 იანვრიდან დაიწყებენ.

„იმ შემთხვევაში, თუ ოჯახის საკუთრებაში არსებული აბანოს ისტორიული ღირებულება დადგინდება, გაფორმდება ხელშეკრულება, რომლითაც მესაკუთრისა და სამსახურის ვალდებულებები განისაზღვრება. კერძო საკუთრებას არავინ ხელყოფს და თუ ეს ისტორიული ძეგლია, ამუშავდება მისი დაცვითი მექანიზმები“, – გვითხრეს კულტურული მემკვიდრეობისა და ძეგლთა დაცვის სააგენტოში.

უწყებაში ამბობენ, რომ თუ შავაძეებს აღმოჩენილი აბანოების ტურისტული მიზნით გამოყენება სურთ და აპირებენ, რომ ის დამთვალიერებლებს აჩვენონ, ძეგლთა დაცვის სააგენტოსთან ეს საკითხიც ხელშეკრულებით შეთანხმდება: „ასევე, თუ კონსერვაცია–რეაბილიტაციის საკითხი დადგება, ესეც, ჩვენთან შეთანხმებული იქნება და აქ ყველა სამუშაო ჩვენი ზედამხედველობით შესრულდება. თუმცა, ჯერ ამ ძეგლის კულტურული და ისტორიული ღირებულებები უნდა განისაზღვროს“.

ახალციხეში, რაბათის დასახლებაში მცხოვრებმა შავაძეებმა რემონტის დროს, ერთ–ერთ ოთახში იატაკის აყრის შემდეგ, სახლის ქვეშ ისტორიული აბანოები აღმოაჩინეს, თუმცა ამის შესახებ შესაბამის უწყებებს არ შეატყობინეს. ნანგრევებს ძეგლთა დაცვის სააგენტო შეისწავლის.

ახალციხის მერიის კულტურის სამსახურში აცხადებენ, რომ შავაძეებს ძეგლი არ დაუზიანებიათ.

[მარიამ ბარიმაძე, ახალციხე]