ტყემლანაში ექვსი მცირეწლოვანი უკიდურეს გაჭირვებაში ცხოვრობს [ფოტო/ვიდეო]

დათო გაგლოევი მეუღლესთან, ექვს მცირეწლოვან შვილთან და ბებიასთან ერთად, ახალციხის მუნიციპალიტეტის სოფელ ტყემლანაში ცხოვრობს. ფანჯრებს ემჩნევა, რომ, მინის ნაცვლად, პოლიეთილენით იყო აკრული, ახლა კი აღარც პარკია. დაზიანებულია ჭერიც. არ აქვთ საყოფაცხოვრებო ავეჯი და ტექნიკა. ოთახებში დგას საწოლები, ტანსაცმლის კარადა და ერთი შეშის ღუმელი.

„საჭმელი გვაქვს, მაგრამ სახლის შეკეთებას ვერ ვახერხებთ. მე თითქმის ყოველდღე ყანაში ვარ და მიწაზე ვმუშაობ. ეს სახლი 60 წელზე მეტისაა და ხელის შევლება უნდა”, - გვითხრა ბავშვების მამამ.

მისი თქმით, საკუთარ 60 მეასედ მიწას ამუშავებს. სახელმწიფოსგან კი დახმარებას – თვეში 650 ლარს იღებს: „ახალ წლებზე ტომარა ფქვილი მოაქვთ ხოლმე“.

ოჯახის შესახებ სოფელ ტყემლანაში გაგლოევების მეზობლებსაც ვკითხეთ.

„არ სცემს, მშიერი არ ჰყავს, უბრალოდ ბინა არ აქვთ ნორმალური. ისეთი ჯანმრთელები და კარგად გაზრდილები არიან, რომ ერთხელ არ წასულან ექიმთან“, - ამბობს გაგლოევების კარის მეზობელი.

„ბავშვები ხან შუშას ჩაამტვრევენ და ხან რას, ადრე ზოგს 10 შვილი ჰყავდა და გაჭირვებაში ზრდიდა, მაგრამ არაჩვეულებრივი ბავშვები გაეზარდათ. უჭირთ თუ არა, მაგ ოჯახზე კარგის მეტი რა მეთქმის“, - გვითხრა რუსიკო ქურდაძემ.

ოჯახში არსებული მდგომარეობა სოციალურმა მუშაკმა, მარიამ ჯაფოშვილმა, რამდენიმე დღის წინ საქველმოქმედო ორგანიზაცია „ერთად შევძლებთ“-ის მიერ გავრცელებული ინფორმაციის შემდეგ შეისწავლა.

თუმცა მას კომენტარის გაკეთება არ სურს: „ბავშვებს ეხება და თემის სენსიტიურობს გამო ამ ეტაპზე ვერაფერს გეტყვით“. როგორც ჩვენთვის ცნობილია, სოცმუშაკმა სახლის მოწესრიგებისთვის ოჯახს ათი დღე მისცა. პირობების დაუკმაყოფილების შემთხვევაში კი, ბავშვებს მინდობით აღზრდაში გადაიყვანენ.

მრავალშვილიან ოჯახში სოციალური მუშაკის ვიზიტის შემდეგ, გაგლოევები სახლს არემონტებენ. დათო გაგლოევის თქმით, მასალით მისი დის ქმარი ეხმარება.

სოფელ ტყემლანაში მცხოვრებ გაგლოევების ოჯახს ახალციხის მუნიციპალიტეტის მერია ყოველკვარტალურად სასურსათო პაკეტით (ფქვილი, ზეთი, შაქარი, ბრინჯი,წიწიბურა) ეხმარება. გარდა ამისა, მერიამ ოჯახს სამშენებლო მასალა გადასცა. გასულ წელს გაგლოევების მცირეწლოვან შვილებს მერიის წამომადგენლებმა სასკოლო ნივთები და ტანსაცმელი უყიდეს.

„ოჯახი არის სოციალურად დაუცველი და სახელმწიფოსგან იღებს შესაბამის დახმარებას. გარდა ამისა, მათ შეეძინათ მეექვსე შვილი. ვინაიდან სოფელი ტყემლანა არის მაღალმთიანი დასახლება, მათ შეუძლიათ ისარგებლონ ახალშობილის კუთვნილი დახმარებით, ყოველთვიურად ორასი ლარის ოდენობით, ორი წლის განმავლობაში. მერია კი, მომართვის შემთხვევაში, ახალშობილს ერთჯერად დახმარებას გაუწევს, 300 ლარის ოდენობით“, – განმარტავენ მერიაში.







[ავთო ინასარიძე, ნანა ინასარიძე, ახალციხე]