გიორგი მარგველაშვილის საარჩევნო პროგრამის პრეზენტაცია 19 სექტემბერს სპორტის სასახლეში გაიმართა. მხარდამჭერთა უმეტესი ნაწილი თბილისიდან იყო. თუმცა, იყვნენ სხვა რეგიონებიდან ჩამოსული მოსახლეობაც, მათ შორის სამცხე-ჯავახეთიდანაც.
წინა რიგებში აკრედიტებული დიპლომატიური კორპუსის წარმომადგენლები, მინისტრთა კაბინეტი და კოალიციის ლიდერები ისხდნენ. ღონისძიებას მსახიობი, ნინელი ჭანკვეტაძე უძღვებოდა, რომელმაც “ქართული ოცნების” მიღწევებზე ისაუბრა და სცენა “ოცნების” ახალგაზრდა აქტივისტებს დაუთმო. ახალგაზრდა აქტივისტების წარმომადგენელმა, ოთარ აბესაძემ საზოგადოებას მარგველაშვილის კანდიდატურის მხარდაჭერისაკენ მოუწოდა.
ახალგაზრდების სიტყვით გამოსვლის შემდეგ სცენაზე საქართველოს პრემიერ-მინისტრი ბიძინა ივანიშვილი გამოვიდა. ივანიშვილმა სპორტის სასახლეში შეკრებილებს ერთი წლის წინანდელი მდგომარეობა შეახსენა და აქცენტი წლის განმავლობაში მიღწეულ წინსვლებზე გააკეთა.
"ერთი წლის წინ დაგპირდით, რომ მოსისხლე რეჟიმს უსისხლოდ დავამარცხებდით და ასეც მოხდა - პრეზიდენტი თავის საკონსტიტუციო ვადას ამთავრებს. თქვენი თანადგომის გარეშე ჩვენ ვერაფერს მოვახერხებდით. ამიტომ, მადლობა თქვენ და მადლობა გუნდს. მინდა გთხოვოთ, მენდეთ მომავალშიც", - განუცხადა პრემიერ-მინისტრმა მხარდამჭერებს.
ივანიშვილმა მარგველაშვილისადმი სიმპათია კიდევ ერთხელ გამოხატა და აღნიშნა, რომ "ოცნებაში" საპრეზიდენტო კანდიდატად მხოლოდ მარგველაშვილი მიაჩნდა.
"დარწმუნებული ვარ წელს, ოქტომბერში, კიდევ ერთხელ ერთ მუშტად შევიკვრებით, ავირჩევთ გიორგი მარგველაშვილს და ხმას მივცემთ საქართველოს წინსვლასა და სტაბილურობას. ღრმად მწამს, რომ გიორგი მარგველაშვილის გამარჯვება იქნება ჩვენი ქვეყნის საერთო გამარჯვება, გიორგი მარგველაშვილი გახდება საქართველოს პრეზიდენტი და ის ყველას პრეზიდენტი იქნება", - განაცხადა ივანიშვილმა.
ივანიშვილის გამოსვლის შემდეგ სცენაზე მარგველაშვილი გამოვიდა. მან სპორტის სასახლეში შეკრებილ საზოგადოებას მხარდაჭერისთვის მადლობა გადაუხადა და საარჩევნო პროგრამა გააცნო. მარგველაშვილმა ქვეყნის განვითარების მთავარ პრიორიტეტად ეკონომიკა დაასახელა და აღნიშნა, რომ მისი გაპრეზიდენტების შემთხვევაში ბიზნესის, განათლების, მეცნიერების, კულტურისა და სხვა სფეროებში ვითარებას გააუმჯობესებდა.
მარგველაშვილის საარჩევნო პროგრამაში ძირითადი აქცენტები შემდეგ საკითხებზეა გაკეთებული: ინვესტიციების მოზიდვა, ბაზრების გაფართოება და საერთაშორისო ეკონომიკურ პროექტებში ჩართვა, უცხოური ინვესტიციების მოზიდვა, ქვეყნის საწარმოო, ენერგეტიკული და სატრანზიტო პოტენციალის გაზრდა, სასამართლოს დეპოლიტიზაცია და სხვა.
მარგველაშვილის გამოსვლა საქართველოს ეროვნული ჰიმნით დაასრულდა. საარჩევნო პროგრამის პრეზენტაციის შემდეგ მარგველაშვილმა კომენტარი მედიასთანაც გააკეთა, რომელმაც მხარდამჭერებს თანადგომისთვის დიდი მადლობა გადაუხადა და არჩევნებში გამარჯვების შემთხვევაში ყველა სფეროში პირობების გაუმჯობესებას დაჰპირდა.
საქართველოს პარლამენტის თავმჯდომარემ დავით უსუფაშვილმა კი აღნიშნა, რომ მარგველაშვილი პრეზიდენტობის კარგი კანდიდატია და საზოგადოებას მისი მხარდაჭერისაკენ მოუწოდა.
[sknews.ge]