სპორტის სასახლეში ”ქართული ოცნების" ყრილობა მიმდინარეობს

"ქართული ოცნება-დემოკრატიული საქართველოს” რიგით მეოთხე ყრილობა საქართველოს სახელმწიფო ჰიმნით გაიხსნა. შეკრებილებს თავდაპირველად პარტიის გენერალურმა მდივანმა კახა კალაძემ მიმართა.

”მოხარული ვარ, რომ დღეს მოგვეცა შეკრების და პარტიის მომავალსა და განახლების პერსპექტივებზე საუბრის საშუალება. დღეს ჩვენ შევიკრიბეთ პარტიის ირგვლივ, რომელიც ფორსმაჟორულ პოლიტიკურ პირობებში, ხალხის სურვილით და ხალხის ნების შესასრულებლად შეიქმნა. ჩვენ გადავლახეთ ურთულესი 2012 წლის არჩევნები, რთული და დაბრკოლებებით აღსავსე რამდენიმე მომდევნო წელი. ჩვენ არ გვიზრუნია პარტიული კომფორტის მოწყობაზე მაშინ, როცა ქვეყანაში ურთულესი ეკონომიკური თუ სოციალური ბარიერები იყო დასაძლევი, ხოლო მოსახლეობა შიშის და ძალადობის წნეხიდან გამოსაყვანი. საქართველო ახალ გზაზე დადგა, სწორ გზაზე", – განაცახდა კახა კალაძემ.

მისი თქმით, საქართველოში არასდროს დაბრუნდება კლანური ან სხვა სახის მმართველობა: "ჩვენ ჩვენ ქვეყანაში მოსახლეობასთან ერთად ხალხის გვერდით დგომით ჩავუყარეთ საფუძველი დემოკრატიული, ევროპული ქვეყნის მშენებლობას, რომლის მართვის სტილი დემოკრატიული და ტოლერანტულია, ქვეყნის, სადაც კანონის ძალით მართავს ხელისუფლება და არა ძალადობით და განუკითხაობით. ჩვენი ლიდერია ხალხი, ჩვენ სწორება გვაქვს საქართველოს კონსტიტუციაზე, ჩვენი უმთავრესი ღირებულებებია თავისუფლება, ერთობა და პროგრესი”.

კალაძის გამოსვლის შემდეგ, ყრილობის დელეგატებმა, პარტია ”ქართული ოცნება - დემოკრატიული საქართველოს” თავმჯდომარედ გიორგი კვირიკაშვილი ერთხმად აირჩიეს. შეგახსენებთ, ეს პოზიცია ვაკანტური მას შემდეგ იყო, რაც ყოფილი პრემიერ-მინისტრი ირაკლი ღარიბაშვილი პარტიიდან წავიდა.

თავის გამოსვლაში პარტიის ახალარჩეულმა თავმჯდომარემ გიორგი კვირიკაშვილმა განაცხადა, რომ ეს პოზიცია მისთვის დიდი პატივია.

”მადლობა მინდა ვუთხრა პარტია "ქართულ ოცნება - დემოკრატიულ საქართველოს" იმ დიდი ნდობისთვის, რომელიც გამომიცხადა. მინდა გითხრათ, რომ ჩემთვის მმართველი პარტიის თავმჯდომარეობა უდიდესი პასუხისმგებლობაა და, პირდაპირ გეტყვით, პოლიტიკური თვალსაზრისით დიდი გამოწვევაც არის. ჩემი კოლეგების, თანამოაზრეებისა და თანაგუნდელების გულწრფელი მხარდაჭერა და ნდობა ასმაგად აძლიერებს ჩემს პასუხისმგებლობას. მე მზად ვარ, ვემსახურო ჩემს სამშობლოს და ყველაფერი გავაკეთო ჩვენი ქვეყნის წინსვლისა და განვითარებისთვის. ჩემთვის დიდი პატივია, ვიყო იმ პარტიის თავმჯდომარე, რომელიც ჩვენი ქვეყნის უახლესი ისტორიის ერთ-ერთ ყველაზე მძიმე დროს შეიქმნა და გარდამტეხი როლი შეასრულა საქართველოს სახელმწიფოს განვითარების გზაზე”, - განაცხადა გიორგი კვირიკაშვილმა.

მან გაწეული საქმიანობისთვის მადლობა გადაუხადა ბიძინა ივანიშვილსა და ირაკლი ღარიბაშვილს.

4–წლიანი მუშაობის შედეგების შეჯამების შემდეგ, გიორგი კვირიკაშვილმა პოლიტსაბჭოს ახალი შემადგენლობის დასახელება დაიწყო.

შეგახსენებთ, დღეს, 14 მაისს, თბილისში, სპორტის სასახლეში "ქართული ოცნება-დემოკრატიული საქართველო” რიგით მეოთხე ყრილობას მართავს.

[ნინო ნარიმანიშვილი, ახალციხე]