საქართველოს პრეზიდენტი ახალციხეში სტუდენტებს შეხვდა

პრეზიდენტი უნივერსიტეტს დღეს, 4 ოქტომბერს სტუმრობდა. შეხვედრა 11:00 საათზე დაიწყო. პრეზიდენტმა ლექცია უნივერსიტეტის ეზოში წაიკითხა.

გიორგი მარგველაშვილი ახალგაზრდებს საარჩევნო პროცესებში ამომრჩევლის როლზე ესაუბრა და კენჭისყრაში მონაწილეობისაკენ მოუწოდა: „საქართველოში ხმის მიცემის უფლება არ ჰქონდათ ჩვენს წინაპრებს და ისინი ამაზე ყოველთვის ოცნებობდნენ. ახლა გვაქვს ეს უფლება, რომლიც გვაძლევს შესაძლებლობას, ქვეყნის განვითარებაში მნიშვნელოვანი წვლილი შევიტანოთ“.

გიორგი მარგველაშვილმა ეკონომიკაში, განათლებასა და სასამართლო სისტემაში არსებულ პრობლემებზეც ისაუბრა და აღნიშნა, რომ მათი მოგვარების გზები ისევ არჩევნებში მოქალაქეობრივი ვალის დაფიქსირებაა.

„არჩევნებში არ მონაწილეობა, ეს არის უარის თქმა, შენი ქვეყნის მოქალაქეობაზე, მიდით არჩევნებზე და აირჩიეთ სასურველი პოლიტიკური ძალა. იცოდეთ, რომ თქვენ ხმას აძლევთ საქართველოს“,-მიმართა გიორგი მარგველაშვილმა სტუდენტებს.

ლექციის შემდეგ საქართველოს პრეზიდენტმა სტუდენტების კითხვებსაც უპასუხა. შეკითხვები ნატოსა და ევროკავშირთან ურთიერთობებსა და ისევ საარჩევნო პროცესებს ეხებოდა.

„მოგეხსენებათ, ჩვენ ვცხოვრობთ, ეთნიკურად მრავალფეროვან რეგიონში, მაინტერესებს რამდენად არიან ისინი ინფორმირებულნი და ჩართულნი საარჩევნო პროცესებში“, - კითხვა პრეზიდენტს უნივერსიტეტის ერთ–ერთმა სტუდენტმა შორენა მჭედლიძემ.

გიორგი მარგველაშვილის თქმით, მრავალეთნიკურობა საქართველოს სიმდიდრეა, თუმცა წინასაარჩევნოდ არამარტო ეთნიკური უმცირესობის, ზოგადად ქვეყნის აქტიურობის დონეა დაბალია. სწორედ ამ ფაქტორმა განაპირობა მისი გადაწყვეტილება, ამომრჩეველთა ინფორმირების ამაღლებისთვის მთელი საქართველ შემოევლო.

„არ ვამბობ, რომ უნდა ყოფილიყო ჩხუბი და დაპირისპირება, უბრალოდ, ყოველთვის მაკლდა საარჩევნო კამპანიის აქტიურობა და პარტიების მხრიდან ამომრჩეველთან ურთიერთობები. სწორედ ამიტომ გადავწყვიტე, მსგავსი შეხვედრები წამომეწყო“, - განაცხადა საქართველოს პრეზიდენტმა.

დღსვე პრეზიდენტმა, სტუდენტებს პროგრამის „შენი ხმა ჩვენი მომავალია“ გამარჯვებული, ახალციხის მეექვსე საჯარო სკოლის გუნდი წარუდგინა და მათ ეს წარმატება კიდევ ერთხელ მიულოცა.

ამომრჩეველთა ინფორმირების მიზნით, გიორგი მარგველაშვილი, უკვე ორი თვეა, მთელი საქართველოს მასშტაბით, სტუდენტებს ხვდება და არჩევნებში მონაწილეობის მნიშვნელობაზე ესაუბრება.

„ვიმედოვნებ, რომ აუცილებლად მიხვალთ 8 ოქტობმრის არჩევნებზე და თქვენი ხმა დიდ სტიმულს მისცემს ქვეყნის განვითარებას“, -განუცხადა გიორგი მარგველაშვილმა სტუდენტებს და მოუწოდა, პოლიტიკური პარტიების პროგრამების მიხედვით ჩამოაყალიბონ რამდენიმე ძირითადი კრიტერიუმი და არჩევნებზე გადაწყვეტილება სწორედ ამის მიხედვით მიიღონ, – „მე გადაწყვეტილების მისაღებად აუცილებლად გავითვალისწინებ: პარტიის საგარეო კურსს, მის ეკონომიკურ პროგრამას და სასამართლო რეფორმისადმი დამოკიდებულებას. ეს სამი მიმართულებაა ჩემთვის გადამწყვეტი“.





[ლუბა გიორგაძე, ახალციხე]