რეგიონში ჩახალიანის განცხადებას აფასებენ

"ერთიანი ჯავახკის" ლიდერმა ვაჰაგნ ჩახალიანმა საპრეზიდენტო არჩევნებში მონაწილე კანდიდატებს გუშინ განცხადებით მიმართა. იგი მოითხოვს, რომ სომხურ ენას რეგიონული სტატუსი მიენიჭოს, ყველა სადავო ეკლესია სომხეთის საპატრიარქოს გადაეცეს, ასევე გაიხსნას სომხური სკოლები, უკვე არსებულ სომხურ სკოლებში კი მოსწავლეებს სომხეთის ისტორიის შესწავლის უფლება მიეცეთ.

არასამთავრობო ორგანიზაცია „დემოკრატ მესხთა კავშირის“ წარმომადგენელი გია ანდღულაძე აცხადებს, რომ ქვეყანაში კომპაქტურად დასახლებულ ეთნიკურ უმცირესობებში, მით უფრო სომხებსა და აზერბაიჯანელებში ბევრი გადაუწყვეტელი პრობლემაა და მათი გადაჭრის გზებზე სახელმწიფომ უნდა იფიქროს.

„ამ პრობლემებზე ეთნიკური ჯგუფების ლიდერები ისაუბრებენ თუ მათი რიგითი წარმომადგენლები, მნიშვნელოვბა არ აქვს. ფაქტია, რომ ეს საკითხები ამ ადამიანებს აწუხებთ“, - ამბობს ანდღულაძე.

მისი თქმთ, თუ აქცენტს არ გავაკეთებთ ჩახალიანის განცხადების ფორმაზე და არ ვიტყვით რომ, ის არის რადიკალური და სასტიკი, სახელმწიფოს და რეინტეგრაციის სამინსიტროს აუცილებლად მოუწევს ამ საკითხებზე ფიქრი.

„ჩახალიანის განცხადება ძალიან რადიკალურია და ბუნებრივია, არ ვფიქრობ, რომ ერთი ხელისმოსმით სადავო ეკლესიები გადავცეთ სომხურ მხარეს, ან აუცილებლად ვაღიაროთ ჯავახეთში სომხური სახელმწიფო ენად და ა. შ. მაგრამ ფაქტია, რომ პრობლემა პრობლემად რჩება და ამ საკითხებს გადაწყვეტა სჭირდება“, - აცხადებს ანდღულაძე.

არ იზიარებს მის მოსაზრებას ადიგენში მოქმედი არასამთავრობო ორგანიზაცია „საზოგადოებრივი დარბაზის“ ხელმძღვანელი გოდერძი კუბლაშვილი. იგი ჩახალიანის განცხადებას უარყოფით შეფასებას აძლევს და ამბობს, რომ „ჯავახკის“ ლიდერი არ მიაჩნია იმ დონის პიროვნებად, რომლის განცხადებებზეც სახელმწიფომ უნდა იმსჯელოს: „თუ ჩახალიანი სომხეთის პრეზიდენტად იყრის კენჭს მხარს სიხარულით დავუჭერ“.

არასერიოზულად მიჩნევს და წინასაარჩევნო პროვოკაციად აფასებს ჩახალიანის განცხადებას, ასოციაცია „ტოლერანტის“ თავმჯდომარე ცირა მესხიშვილი: „ის არ არის არც პოლიტიკური ფიგურა და არც ავტორიტეტი. მას უნდა, რომ რაღაცით გამოიჩინოს თავი. ვინ ჰკითხავს ჩახალიანს ეკლესიების სომხებზე გადაცემას?! ჯერ ის უდნა გაირკვეს რომელი ეკლესიაა ქართული და რომელი სომხური“.

მესხიშვილის მოსაზრებას იზიარებს, ახალქალაქში მოქმედი არასამთავრობო ორგანიზაიცა „ქალები ჯავახეთის მომავლისთვის“ დირექტორი დალი აღდგომელაძე:

„ჩახალიანი არასერიოზული ადამიანია. მისი აზრი არ არის მნიშვნელოვანი არც ჩემთვის და არც მოსახლეობისთვის. ასე ის პიარს იკეთებს და ჰგონია, რომ რაღაცას წარმოადგენს. ჯავახეთში მის მოსაზრებას უმრავლესობა ნამდვილად არ იზიარებს, ამიტომ არ აქვს უფლება, რომ ილაპარაკოს ჯავახეთის სახელით“, - ამბობს აღდგომელაძე.

{თამუნა უჩიძე, ახალციხე]