ბორჯომში ძლიერმა წვიმამ ქუჩები დატბორა

ძლიერი წვიმა ბორჯომში, 8 ივნისს, დაახლოებით 19:00 საათზე მოვიდა. ნალექის შედეგად, ახალშენის დასახლებაში ე.წ ცოფიანი ღელე ადიდდა და ნაშალი მასალა ქუჩებზე გადმოიტანა. ადგილობრივ თვითთმმართველობაში ამბობენ, რომ სტიქიას მნიშვნელოვანი ზარალი არ გამოუწვევია. ქვა–ღორღისგან ბორჯომის ქუჩების გაწმენდა გუშინ გვიან ღამით დაიწყო.

"არცერთ ეზოში არ შესულა წყალი, არც სახლებში. ქუჩებია მხოლოდ დატბორილი ლამი და დიდი ლოდები აქვს ჩამოტანილი. ლოდებისგან უბნები მძიმე ტექნიკით უკვე გავწმინდეთ, ახლა ცოცხალი ძალა მუშაობს და ასუფთავებენ", – განმარტავს ბორჯომის მუნიციპალიტეტის მერის მოადგილე ბუბა ბერიძე.

[თაკო ფეიქრიშვილი, ბორჯომი]