1 მლნ ლარი – ბორჯომში 7 ივნისის სტიქიის შედეგები დაითვალეს

არქივი

შვიდ ივნისს, ბორჯომში მოსული ძლიერი წვიმის და სეტყვის შედეგად, 26 საცხოვრებელი სახლის სახურავი დაზიანდა. მათგან 12 კორპუსია, 14 კი კერძო სახლი.

ბორჯომის მერიის ინფორმაციით, თვითმმართველობა კერძო სახლებისთვის სახურავის მასალას შეისყიდის, ხოლო მრავალბინიანი საცხოვრებლებისთვის სამუშაოებს ტენდერში გამარჯვებული კომპანია შეასრულებს.

12 კორპუსის სახურავის რეაბილიტაციისთვის მერიის მიერ დათვლილი თანხა 945 094 ლარს შეადგენს. მუნიციპალიტეტის ინფორმაციით, სამუშაოების გარკვეულ ნაწილს ადგილობრივი თვითმმართველობა უზრუნველყოფს, ნაწილი კი ცენტრალური ბიუჯეტიდან დაფინანსდება.

„ამასთანავე დავეხმარებით 14 კერძო სახლის მცხოვრებლებს. დაზიანებული სახურავების ახლით შესაცვლელად მერიის სარეზერვო ფონდიდან გამოიყოფა 47 377 ლარი. თანხით შევისყიდით ახალ სახურავის მასალას და გადავცემთ სახლების მეპატრონეებს“, - აცხადებენ ბორჯომის მერიაში.

ძლიერი წვიმა და სეტყვა ბორჯომში შვიდ ივნისს, დაახლოებით 15:30 საათზე დაიწყო. ადგილობრივების თქმით, სტიქია რამდენიმე წუთის განმავლობაში გრძელდებოდა. სეტყვას მნიშვნელოვანი ზიანი არ გამოუწვევია, თუმცა წყალმა ქუჩები და ეზოები დატბორა.

[თაკო ფეიქრიშვილი, ბორჯომი]