ბორჯომში ცენტრალური სტადიონის ინფრასტრუქტურა მოეწყობა

ბორჯომის ცენტრალურ სტადიონზე ფეხბურთის ფედერაცია ჰიბრიდული ტიპის მეოთხე თაობის საფარს დააგებს. ბორჯომის მერია კი გასახდელებს, საშხაპეებს და ტრიბუნებს მოაწყობს.

„რადგან ახლა ინფრასტრუქტურა მოწყობილი არაა, ფეხბურთელებს სტადიონთან არსებული სასტუმროს ნომრების ქირაობა უწევთ. რამდენიმე დღეში სტადიონის რეაბილიტაციის პროექტი მზად იქნება და ტენდერს გამოვაცხადებთ“, – ამბობს ბორჯომის მერის მოადგილე ბუბა ბერიძე.

ცენტრალური სტადიონით ბორჯომის ორი საფეხბურთო გუნდი, „ბორჯომი“ და „თორი“ სარგებლობენ. ამ დროისთვის უმაღლეს ლიგაში არცერთი მათგანი არ თამაშობს, თუმცა, თუ რომელიმე გუნდი უმაღლეს ლიგაში გადასვლას შეძლებს, რეაბილიტირებულ სტადიონზე ვეღარ ითამაშებს. მიზეზი ისაა, რომ სტანდარტი, რომლის მიხედვითაც სტადიონი ეწყობა, უმაღლესი ლიგის მოთხოვნებს ვერ აკმაყოფილებს.

ფეხბურთის ფედერაცია მოედნის საფარის დაგებისთვის 500 000–600 000 ლარს დახარჯავს. რა თანხას გამოყოფს ბორჯომის მერია ჯერ განსაზღვრული არაა.

[ავთო ინასარიძე, ახალციხე]