„ოცნების“ წევრებმა მორიგი საინფორმაციო აქცია გამართეს [Video]

გიორგი მარგველაშვილთან ერთად, 12 სექტემბერს ახალციხეს სოფლის მეურნეობის მინისტრი შალვა ფიფია, საქართველოს ენერგეტიკის მინისტრი კახა კალაძე და ხელოვნებისა და შემოქმედების მუშაკები კახი კავსაძე, ვაჟა აზარაშვილი, თემურ ყვითელაშვილი და თემურ ჩხეიძეც ესტუმრებიან.

„დღეს მოსახლეობას გიორგი მარგველაშვილის ვიზიტის შესახებ ვაცნობეთ. ყველას მოვუწოდებთ, რომ დახვდნენ პრეზიდენტობის კანდიდატს გააცნონ პრობლემები და შემდეგ დავსახოთ ამ პრობლემების მოგვარების გზები“,- ამბობს „ქართული ოცნების“ ახალციხის შატაბის უფროსი მალხაზ ჟუჟუნაძე.



აქციაზე, მალხაზ ჟუჟუნაძის გარდა, მოსახლეობას სიტყვით ახალციხის კულტურის დაწესებულებათა გაერთიანების ხელმძღვანელმა გია ჟუჟუნაძემ და „კონსერვატიული პარტიის“ ახალციხის ორგანიზაციის თავჯდომარემ უჩა კახნიაშვილმა მიმართეს.

გამომსვლელებს შორის იყო სოფელ არლის მკვიდრი, რომელმაც „ნაციონალურ მოძრაობის“ წევრებს „ოცნებაში“ გაერთიანებისკენ მოუწოდა: „ნაციონალებს" ისე ჩააგონეს და შეაშინეს, მათ სხვა გზა არ ჰქონდათ. მათ ახლა უნდა ვუთანაგრძნოთ, ფსიქოლოგიურად უნდა განვკურნოთ და ვუთხრათ, რომ ის წუმპე იყო და სიმშრალეზე ამოსვლისკენ მოვუწოდოთ“.

მსგავსი აქცია, ახალციხის ცენტრში, ასევე, საბარგო სადგურისა და მარდის დასახლებაში, გუშინაც გაიმართა.

„ოცნებაში“ ამბობენ, რომ მსგავის აქციების გამართვა სოფლებშიც იგეგმება.



[მანანა სარაშვილი, ახალციხე]