კომისიის წევრები არჩევნებისთვის ემზადებიან (R)

ახალციხის საოლქო საარჩევნო კომისიამ საარჩევნო უბნებზე ადმინისტრაციის წევრები უკვე დააკომპლექტა. ახალციხის საოლქო საარჩევნო კომისია 13 წევრისგან შედგება. აქედან ერთი "ერთიანი ნაციონალური მოძრაობის" წარმომადგენელია, ექვსი კი პოლიტიკური კოალიცია „ქართულ ოცნებაში“ შემავალი პარტიების: „საქართველოს კონსერვატიული პარტიის“, „მრეწველების“, „ეროვნული ფორუმის“, „საქართველოს რესპუბლიკური პარტიის“, „თავისუფალი დემოკრატების“ და „ქართული ოცნების“ წევრები არიან.

13 წევრიდან ექვსს საოლქო საარჩევნო კომისია, კონკურსის საფუძველზე ირჩევს, შვიდ წევრს პარტიები წარადგენენ. კომისიის წევრებმა უნდა აირჩიოს კომისიის თავმჯდომარე, მოადგილე და მდივანი.

„იმ წევრებიდან, რომლის შერჩევაც საოლქო საარჩევნო კომისიის პრეროგატივა იყო, ჩვენი მხარდამჭერებიც იყვნენ, თუმცა აქედან კომისიაში ზოგი მოხვდა, ზოგი ვერა. რაც შეეხება კომისიის თავმჯდომარის, მოადგილისა და მდივნის შერჩევას ამაში ჩვენ პოლიტიკური პარტიები ვერ ჩავერევით“,-ამბობს მალხაზ ჟუჟუნაძე.

ამ ეტაპზე საუბნო საარჩევნო კომისიის წევრებს ტრენინგები უტარდებათ. როგორც“ ქართული ოცნების“ ახალციხის შტაბში ამბობენ ტრენინგების პირველი ეტაპი 13 სექტემბერს დაიწყო და 21 სექტემბერს მთავრდება.

მალხაზ ჟუჟუნაძე ამბობს, რომ "ქართული ოცნების" წარმომადგენლებს, რომლებიც კომისიაში არიან ტრენინგები დამატებითაც ჩაუტარდებათ.

„ვგეგმავთ, რომ ჩვენს წევრებს ტრენინგები კიდევ ჩაუტაროთ. გვაქვს ცესკოს მიერ გამოშვებული ბროშურები და სახელმძღვანელოები, რომლის დახმარებითაც ვიხელმძღვანელებთ“,-ამბობს ჟუჟუნაძე.

[sknews.ge]