სხვილისთან ავარიის შედეგად ოთხი პირი დაშავდა, მათ შორის ერთი მცირეწლოვანია

ავტოსაგზაო შემთხვევა სხვილისთან დღეს, რვა მაისს, დაახლოებით 10:00 საათზე მოხდა. შეჯახების შედეგად „ფორდ ტრანზიტი“ გზის სავალი ნაწილიდან გადავიდა და ამოყირავდა.

ორივე მანქანა სატვირთოა. „მერსედესში“ მყოფი ოთხი პირიდან სამი დაშავდა, მათ შორის 10 წლამდე მოზარდი, „ფორდ ტრანზიტში“ კი მხოლოდ მძღოლმა მიიღო დაზიანებები.

„ერთი ბავშვია 10 წლამდე, ასევე, დაშავებულია ორი ქალი და ერთი კაცი. გამოკვლევები უტარდებათ“, – აცხადებენ ახალციხის რეფერალურ ჰოსპიტალში.

შსს-მ გამოძიება სსკ-ის 276 მუხლის 2 ნაწილით დაიწყო, რაც ავტომობილის მოძრაობის უსაფრთხოების წესის დარღვევას გულისხმობს, რამაც ჯანმრთელობის ნაკლებად მძიმე დაზიანება გამოიწვია.

[თინათინ ზაზაძე, ახალციხე]