მესხეთის თეატრში ლიეტუველი რეჟისორის სპექტაკლის პრემიერა გაიმართება [ფოტო/ვიდეო]

უკრაინელი მწერლის, ივან ფრანკოს "მოპარული ბედნიერება" არის სიყვარულის ისტორია, რომელიც გარკვეული მიზეზების გამო, ვერ შედგა. თუმცა, წლების შემდეგ ამ გრძნობამ ახალი ძალით იფეთქა და მსხვერპლიც მოითხოვა. მოქმედება მე–19 საუკუნეში, ერთ პატარა სოფელში ხდება.

პრემიერა მესხეთის დრამატულ თეატრში ხვალ, სამ მაისს, 19:00 საათზე დაიწყება.

„სპექტაკლი სიყვარულზეა, იმაზეა რომ არ შეიძლება ვინმეს მოპარო ნახევარი ანუ სიყვარული. შურისძიება ეს საშინელი რამაა. ამ შემთხვევაში მხოლოდ ის ადამინები კი არ ხდებიან უბედურები, ვისაც სიყვარული მოპარეს, არამედ ისინიც, ვისაც სამაგიეროს გადაუხდიან და ამით უბედური ხდება მთელი საზოგადოება“,–ამბობს ზაიკაუსკასი.

ლინას ზაიკაუსკასი ახალციხეში პირველადაა. მესხეთის დრამატულ თეატრში სპექტაკლის დადგმა თეატრის დირექტორისა და სამხატვრო ხელმძღვანელის თხოვნის შემდეგ გადაწყვიტა: „ოთხი აპრილიდან უკვე აქ ვარ, და აქტიურად ვმუშაობ მსახიობებთან ერთად. ეს ჩემი 110–ე სპექტაკლია“.

რეჟისორი იმედოვნებს, რომ ახალციხელი მაყურებელი კმაყოფილი დარჩება.

„ჩვენ უნდა ვიყოთ მომთხოვნები საკუთარი თავის მიმართ, იმიტომ რომ ჩვენ ვყიდით სპექტაკლს, ამიტომ საჭიროა რომ შევქმნათ მაქსიმალურად კარგი პროდუქტი, რომ ვიყოთ მართლები ჩვენი თავის და ხალხის წინაშე“.



სპექტაკლში ექვსი მსახიობი თამაშობს, ერთ– ერთი მთავარი როლის შემსრულებელი მსახიობი ლიაკო გოგიძეა. მისი თქმით, კარიერის მანძლზე ყველაზე რთული როლის შესრულება მოუწევს.

„მე ვთამაშობ ახალგაზრდა გოგოს, ანას როლს, რომელსაც საკმაოდ რთული ცხოვრება აქვს. ჩემთვის საკმაოდ რთული სათამაშო სპექტაკლია, ორი საათის განმავლობაში გრძელდება და სცენიდან თითქმის არ გავდივარ“, – ამბობს მსახიობი.
ლიეტუველი რეჟისორი საქართველოს პრემიერის დასრულების შემდეგ დატოვებს.





[მარიამ ბარძიმაძე, ნანა ინასარიძე, ახალციხე]