მეოთხე პრემიერა მესხეთის თეატრში

ამერიკელი დრამატურგის ნილ საიმონის პიესა ”ჩემი ქალები და ქალიშვილი”, მესხეთის სცენაზე რეჟისორმა გიორგი შალუტაშვილმა დადგა.

ერთმოქმედებიან დრამაში მთავარ როლს მესხეთის თეატრის მსახიობი ლაშა ბუტულაშვილი ასრულებს.

”სპექტაკლი ცოლ-ქმრული ურთიერთობის მარადიული პრობლემაზეა, რომელიც ყოველ დროს და ყველასთვის აქტუალურია. ამიტომ, ვფიქრობთ, რომ სპექტაკლი ყველა ეროვნებისთვის ადვილად გასაგებია”, - ამბობს მესხეთის თეატრის მმართველი და სპექტაკლში ერთ-ერთი როლის შემსრულებელი ლია სულუაშვილი.

მესხეთის სახელმწიფო დრამატულ თეატრში 45-ე სეზონი 26 აპრილს, სპექტაკლ ”ქეთევანით” გაიხსნა. ამ სეზონზე თეატრი მაყურებელს 8 პრემიერას შესთავაზებს.

მომდევნო პრემიერა 11 სექტემბერსაა დაგეგმილი. ეს იქნება ერთმოქმედებიანი კლოუნადა, მხიარული კომედია ადამიანთა ურთიერთობებზე. ამის შემდეგ მაყურებელი იხილავს შოთა რუსთაველის თეატრისა და კინოს უნივერსიტეტის დიპლომანტი რეჟისორის ირაკლი ძნელაძის მიერ დადგმულ პიესას ”ირინეს ბედნიერება”. სეზონის მეშვიდე პრემიერა კახა გოგიძის ილია ჭავჭავაძის ცხოვრების მიხედვით დადგმული სპექტაკლი ”ვინ” (”მარად და ყველგან”) იქნება. მიმდინარე წლის სეზონი ოქტომბერში, ნუგზარ ლორთქიფანიძის სპექტაკლით, ”უცნაური მისის ევაჟით” დასრულდება.

[ნინო ნარიმანიშვილი, ახალციხე]