„ყვარყვარე“ - პრემიერა მესხეთის თეატრში

სპექტაკლზე მუშაობა მსახიობებმა დაახლოებით ერთი თვის წინ დაიწყეს. მასში მონაწილეობას თეატრის დასის თითქმის სრული შემადგენლობა იღებს. ყვარყვარეს მსახიობი ლაშა ბუტულაშვილი ასრულებს.

ახალგაზრდა რეჟისორს მესხეთის სახელმწიფო თეატრის დასთან მუშაობა გასულ წელსაც მოუწია. ნიკოლოზ საბაშვილის რეჟისორობით მაშინ სპექტაკლი „ქაღალდის წვიმა“ დაიდგა.

„ძალიან კარგად გავიცანი როგორც თეტარის დასი, ასევე ახალციხელი მაყურებელიც და ძალიან დიდი პატივისცემით ვარ მათ მიმართ განწყობილი, ყოველთვის ვიქნები ამ თეატრის მაყურებელი და ვიშრომებ მათთვის“, - ამბობს სპექტაკლის რეჟისორი ნიკოლოზ საბაშვილი.

პოლიკარპე კაკაპაძემ ნაწარმოები 1928 წელს შექმნა. მას შემდეგ პიესა ქართული თეატრის სცენაზე არაერთხელ დაიდგა. „ყვარყვარე“ კომედიური ჟანრის, ორმოქმედებიანი სპექტაკლია, სადაც ქვეყანაში არსებულ პოლიტიკურ რეალობას მორგებული ადამიანის ცხოვრებაა ნაჩვენები.

„გინდა არ თუ არ გინდა, ამ სპექტაკლს თან ახლავს პოლიტიკური ელფერი, მაგრამ ამ შემთხვევაში ჩვენ ყურადღება გავამახვილეთ ადამიანების ურთიერთობაზე და მაქსიმალურად ვეცადეთ, რომ პოლიტიკა უკანა ფონზე გადაგვეწია. განსხვევბული ინტერპრეტაცია არაა, უბრალოდ ჩვენი ხედვაა ასეთი, რაშიც დასიც დამეთანხმა“, - ამბობს რეჟისორი.

მესხეთის სახელმწიფო დრამატული თეატრის სცენაზე სპექტაკლი „ყვარყვარე“ ხვალ, 6 ივნისსაც გაიმართება.

[თამარ თოთაძე, ახალციხე]