მზადება სააღდგომო გამოფენისთვის

29 აპრილს, ახალციხის სამხატვრო სკოლა, საქართველოს საპატრიარქოში, სააღდგომო თემაზე შექმნილი ნამუშევრების გამოფენას გამართავს. გამოფენაზე სამხატვრო სკოლები და სახელოვნებო სტუდიები საქართველოს სხვადასხვა რეგიონებიდან არიან მიწვეული.

მოხატული თეფშები, ცხვრები, ანგელოზები, სააღდგომო ზარები და კვერცხები, - იმ ნამუშევართა მცირე ჩამონათვალია, რომლებიც ახალციხის სამხატვრო სკოლაში გამოფენაზე გასატანად მზადდება.

როგორც სამხატვრო სკოლაში გვიხსნიან, ნამუშევრები ზეთში, აკვარელში, გუაშში, გრაფიკაში მზადდება. იქნება ტრადიციული, თეთრი თიხით შესრულებული ნაშრომებიც.

ახალციხის სამხატვრო სკოლის დირექტორი ნანა ნათენაძე ამბობს, რომ მათ პირველად იმუშავეს თეთრ თიხაზე: „ეს მასალა პირველად შემოვიტანეთ ჩვენს სკოლაში, ჰგავს ტრადიციულ თიხას, თუმცა იგი ბევრად ნაზია, ვაკეთებთ მისგან თემატურ ნაშრომებს, მოვხატავთ, ამოვავლებთ ჭიქურში და ბოლოს გამოვწვავთ, შედეგი ძალიან ორიგინალურია“.

ყველა ამ ნამუშევარს, რასაც საპატრიარქოში წარადგენენ, მსურველები ახალციხეშიც ნახავენ. სამხატვრო სკოლა სააღდგომო გამოფენას ახალციხეშიც გამართავს.







[მარიამ ბარძიმაძე, ახალციხე]