სამცხე–ჯავახეთში 9 აპრილის მემორიალები ყვავილებით შეამკეს [Photo]

1989 წლის ცხრა აპრილის 30 წელისთავთან, ასპინძის ცენტრიდან ხვილიშას წმინდა გიორგის სახელობის ეკლესიის ეზოში მდებარე 9 აპრილის მემორიალამდე დროშებით მსვლელობა მოეწყო. მუნიციპალიტეტის პირველმა პირებმა, დაღუპული გმირები გაიხსნეს და მემორიალი გვირგვინით და ყვავილებით შეამკეს. ხვილიშას ეკლესიის მღვდელმსახურმა დავითმა კი დაღუპულთა მოსახსენიებელი პანაშვიდი გადაიხადა. პანაშვიდის დასრულების შემდეგ, ვაჟთა ფოლკლორულმა ანსამბლმა "წუნდამ“ ქართული ხალხური სიმღერები და საგალობლები შეასრულა. სიმღერის ფონზე ახალგაზრდებმა ლექსები წაიკითხეს.



მსვლელობა მოეწყო ნინოწმინდაშიც. მუნიციპალიტეტის მერმა ანივარდ მოსოიანმა და თვითმმართველობის სხვა თანამშრომლებმა ქალაქის ცენტრში მდებარე ჰაიოს-ქართლოსის პარკში დაღუპულთა მემორიალთან ყვავილები მიიტანეს.



ბორჯომშიც ადგილობრივი ხელისუფლების წარმომადგენლები და რიგითი მოქალაქეები 9 აპრილის მემორიალთან შეკირიბნენ და დაღუპულ გმირებს პატივი მიაგეს. მემორიალთან ბორჯომისა და ბაკურიანის ეპისკოპოსმა ლაზარემ გარდაცვლილების სულების მოსახსენიებელი პანაშვიდი გადაიხადა. ბორჯომის კულტურისა და ხელოვნების ცენტრის ორგანიზებით აქვზე მოეწყო თემატური ღონისძიება. ცეკვები და სიმღერები შეასრულეს ადგილობრივმა ჯგუფებმაც.



ადიგენსა და ახალციხეში ცხრა აპრილს გარდაცვლილთა პატივის მისაგებად მემორიალებთან თვითმმართველობების წარმომადგენლებთან ერთად სამცხე–ჯავახეთის სამხარეო ადმინისტრაციის და დეპუტატის ბიუროს წარმომადგენლებიც შეიკრიბნენ.



1989 წლის 9 აპრილს გამთენიისას, საბჭოთა არმიამ, რუსთაველის გამზირზე შეკრებილი მშვიდობიანი აქცია დაარბია, დაიღუპა 21 ადამიანი და ათასობით მოქალაქე კი დაშავდა.

[sknews.ge]