ახალციხეში 1989 წლის 9 აპრილი გაიხსენეს

შეკრებილთა შორის იყვნენ ახალციხის მერიისა და გამგეობის წარმომადგენლები, სასულიერო პირები და 9 აპრილის მონაწილეები.

„იმ დროს უნივერსიტეტში ვსწავლობდი და როგორც ყველა სტუდენტი, მეც იქ ვიყავი. გვითხრეს დაიშალეთო, მაგრამ არ დავიშალეთ და არეულობაში მოვხვდით. ეს დღე ჩემთვის განსაკუთრებით მძიმეა, თუნდაც იმიტომ, რომ ჩემს გვერდით ბევრი ახალგაზრდა დაიღუპა. რომ არა ერთი ვაჟკაცი, რომელმაც იმ არეულობიდან გამომიყვანა, ცოცხალი აღარ ვიქნებოდი“, – ამბობს ციალა ჯინჭველაძე და იხსენებს, რომ არეულობის დროს ის რაგბისტებთან ახლოს მოხვდა, რომლებმაც ჯაჭვი გააკეთეს და ახალგაზრდები გადაარჩინეს.

9 აპრილის ტრაგედიიდან 26 წელიწადი გავიდა.

„დღეს შევიკრიბეთ, რომ პატივისცემა გამოვხატოთ იმ ადამიანების მიმართ, რომლებმაც თავი გასწირეს 9 აპრილს და თავისუფლებას შეეწირნენ“, – განაცხადა ქალაქ ახალციხის მერმა გიორგი კოპაძემ.

„დღევანდელი დღე ძალიან მნიშვნელოვანია ქართველი ერისთვის. ცათა სასუფეველი დაუმკვიდროს უფალმა, ვინც ქვეყნისთვის თავი დადო“, – ამბობს ახალციხის მუნიციპალიტეტის გამგებელი ზაზა მელიქიძე.

9 აპრილს დაღუპულთა მოსახსენიებელი პარაკლისი დეკანოზმა, მამა იოანე გელაშვილმა გადაიხადა. პარაკლისის შემდეგ ფოლკლორულმა ანსამბლმა „მესხეთმა“ რამდენიმე სიმღერა შეასრულა.

ზუსტად 26 წლის წინ, თბილისში, დილის 04.00. საათზე, შოთა რუსთაველის გამზირზე, მაშინდელი მთავრობის სასახლის წინ, საბჭოთა კავშირის სპეციალური დანიშნულების რაზმმა მშვიდობიანი მიტინგი სასანგრე ნიჩბების, ხელკეტებისა და გაზის გამოყენებით დაარბია. მიტინგის დაშლისას ადგილზე 21 მოქალაქე დაიღუპა.

[თამარ თოთაძე, ახალციხე]