ახალციხეში 1989 წლის 9 აპრილი გაიხსენეს

ცენტრალურ პარკში მდებარე 9 აპრილის მემორიალთან ქალაქის მერიისა და გამგეობის თანამშრომლები, სასულიერო პირები, 9 აპრილის მონაწილეები და ადგილობრივი მოსახლეობა 12:00 საათზე შეიკრიბნენ.

ადგილობრივი ხელისუფლების წარმომადგენლებმა 9 აპრილს დაღუპული გმირები გაიხსნეს და მემორიალი ყვავილებით შეამკეს.

“ეს არის ჩვენი ერის გამოღვიძების დღე. დღე, როდესაც საქართველომ ხმა აიმაღლა კომუნისტური რეჟიმის წინააღმდეგ“, – ამბობს ქალაქის მერი გიორგი კოპაძე.

შეკრებილთა შორის იყვნენ ის ადამიანები, რომლებმაც 9 აპრილის ტრაგედია საკუთარი თვალით ნახეს. მიუხედავად იმისა, რომ 1989 წლის 9 აპრილის შემდეგ დიდი დრო გავიდა, ციალა ჯინჭველაძეს იმ დღის გახსენება უჭირს.

„ეს დღეს სიახარულისა და სევდეს დღეა. 9 აპრილმა საქართველოს დამოუკიდებლობის აღდგენას სათავე ჩაუყარა. ისეთი ერთიანი საქართველო, როგორიც 1989 წლის 9 აპრილს ვნახე, არასდროს მახსოვს“, – ამბობს იგი.

ახალციხის მაცხოვრის ამაღლების ტაძრის მღვდელმსახურმა მამა ნიკოლოზმა, მემორიალთან, 9 აპრილს დაღუპულთა მოსახსენიებელი პარაკლისი გადაიხადა. პარაკლისის დასრულების შემდეგ, ფოლკლორულმა ანსამბლმა „მესხეთმა“ რამდენიმე სიმღერა შეასრულა.

ამის შემდეგ, ადგილობრივი ხელისუფლების წარმომადგენლებმა, ახალციხის ცენტრალური პარკის მიმდებარე ტერიტორიაზე ფიჭვის ნერგები დარგეს.

შეგახსენებთ, რომ დღეს, 9 აპრილს, 27 წელი გავიდა 1989 წლის 9 აპრილის იმ მოვლენებიდან, როცა საქართველოს დამოუკიდებლობის მოთხოვნით გამართული დემონსტრაცია, საბჭოთა არმიამ ჩაახშო. 21 ადამიანი დაიღუპა და ასობით დაიჭრა, მოიწამლა და დასახიჩრდა.

[ვარლამ წიკლაური, ახალციხე]