ადიგენის საკრებულოს გადაწყვეტილება მინარეთის დემონტაჟის შესახებ

ბრძანებაში ნათქვამია, რომ ადიგენის მუნიციპალიტეტის სოფელ ჭელაში მცხოვრები დავით ჩოგაძე, როგორც უნებართვო მშენებლობის მწარმოებელი უნდა დაჯარიმდეს 200 ლარით და მასვე უნდა დაევალოს საკუთარი სახსრებით უზრუნველყოს კანონმდებლობის დარღვევით აშენებული ნაგებობის მთლიანად დემონტაჟი.

"კანონმდებლობის დარღვევით აშენებული ნაგებობის დემონტაჟი განხორციელდეს წინამდებარე ბრძანების სამართალდამრღვევზე ჩაბარებიდან 3 (სამი) კალენდარული დღის განმავლობაში, ხოლო ჯარიმის გადახდა 30 (ოცდაათი) კალენდარული დღის განმავლობაში საქართველოს ცენტრალური ბიუჯეტის შემოსულობებით განსაზღვრული შესაბამისი სახაზინო კოდით", - ნათქვამია საკრებულოს #ს-63 ბრძანებაში.

ბრძანების თანახმად, ჯარიმის გადახდა სამართალდამრღვევს არ ათავისუფლებს კანონმდებლობის დარღვევით აშენებული ნაგებობის დემონტაჟის ვალდებულებისგან. დადგენილ ვადაში ჯარიმის გადაუხდელობა კი გამოიწვევს საურავის დაკისრებას დაკისრებული ჯარიმის ერთმაგი ოდენობით.

"ბრძანების ნებაყოფლობით შეუსრულებლობის შემთხვევაში აღსრულება მოხდება „სააღსრულებლო წარმოებათა შესახებ“ საქართველოს კანონის შესაბამისად", - ნვკითხულობთ დოკუმენტში.

საკრებულოს მიერ დამტკიცებული დოკუმენტის თანახმად, დაინტერესებული პირის მიერ ბრძანება შეიძლება გასაჩივრდეს მისი გაცნობიდან 15 (თხუთმეტი) დღის ვადაში ახალციხის რაიონულ სასამართლოში.

ადიგენის მუნიციპალიტეტის საკრებულოს 2013 წლის 20 აგვისტოს გამოცემულ ბრძანებას ადიგენის მუნიციპალიტეტის საკრებულოს თავჯდომარე გივი ენდელაძე აწერს ხელს.

შეგახსენებთ, რომ ადიგენის გამგეობამ ჭელის მინარეთის საქმის შესწავლა მიმდინარე წლის 1 აგვისტოს დაიწყო. 26 აგვისტოს მინარეთის დემონტაჟი განხორციელდა, თუმცა, დემონტაჟი არა გამგეობამ, არამედ საბაჟომ განახორციელა.

მინარეთის დემონტაჟის შემდეგ, ორი დღის განმავლობაში მუსლიმები ახალციხეში აქციას მართავდნენ მინარეთის დაბრუნების მოთხოვნით. 28 აგვისტოს საქართველოს სხვადასხვა კუთხიდან მუსლიმები ბათუმში შეიკრიბნენ. აქ მათ მიიღეს დაპირება აჭარის მთავრობის თავმჯდომარისგან, რომ ხელისუფლება მინარეთს აღუდგენდა. დღეს, 29 აგვისტოს, შემოსავლების სამსახურმა განაცხადა, რომ მინარეთს სავარაუდოდ დღეს დააბრუნებენ სოფელ ჭელაში. პარალელურად, დღეს დილიდან ახალციხეში მიმდინარეობს მართლმადიდებლების აქცია. ისინი ამბობენ, რომ არ დაუშვებენ მინარეთის ჭელაში დაბრუნებას. ამ წუთებში აქციის მონაწილეებს, ახალციხეში, ავტოსადგურის მიმდებარე ტერიტორიაზე ცენტრალური მაგისტრალი აქვთ გადაკეტილი. ადიგენისკენ მოძრაობა შეუძლებელია.

[sknews.ge]