ჭელაში მომხდარს დღეს კანცელარიასთან გააპროტესტებენ

"26 აგვისტოს სოფელ ჭელაში მეჩეთთან არსბეული მინარეთის დემონტაჟი განხორციელდა, რასაც ეწინააღმდეგებოდა ადგილობრივი მოსახლეობა. პოლიციამ სცემა და დააკავა სოფელ ჭელის მაცხოვრებლები, რომლებიც ცდილობდნენ წინააღმდეგობა გაეწიათ მინარეთის დემონტაჟისათვის. საქართველოს მოქალაქეები აღშფოთებას გამოვთქვამთ მომხდარი ფაქტის გამო და მოვითხოვთ დაიწყოს გამოძიება შსს სპეცნაზის მიერ გადამეტებული ძალის გამოყენებაზე. ასევე მივმართავთ ცენტრალურ ხელისუფლებას მოთხოვნით, გამოარკვიოს მინარეთის დაშლის ბრძანების მართებულობა. აქამდე გაკეთებული განცხადება იმის თაობაზე, რომ მინარეთის მშენებლობა საბაჟო წესების დარღვევით შემოტანილი სამშენებლო მასალით მიმდინარეობდა არის აბსურდული",-ნათქვამია განცხადებაში, რომელიც გავრცელდა ფეისბუქის გვერდზე "სოლიდარობა ჭელაში მცხოვრებ მუსლიმებს".

ფეისბუქის აღნიშნული გვერდი გუშინ, 26 აგვისტოს, სოფელ ჭელაში მომხდარი მოვლენების შემდეგ შეიქმნა.

შეგახსენებთ, გუშინ, სოფელ ჭელაში მინარეთის დემონტაჟი განხორციელდა, რასაც სოფელში დაძაბულობა მოჰყვა. დააკავეს 21 ადამიანი, მათგან 9 ჯერ ისევ პატიმრობაში რჩება.



[sknews.ge]