ნინოწმინდაში აგრარული ბაზარი აშენდება

აგრარული ბაზრის მშენებლობისთვის ნინოწმინდის მერიამ ტენდერი 191 000 ლარზე გამოაცხადა. ამ დრომდე, ქალაქში სხვადასხვა პროდუქტი ქუჩებში, სხვადასხვა ადგილზე იყიდება.

„ბაზრის მოწყობით ვაჭრობა არალეგალური ადგილებიდან კონტროლირებად ტერიტორიაზე გადავა. წლებია რაც ქალაქს აგრარული ბაზარი არ აქვს და ჩვენი მიზანია, რომ ხალხი კონკრეტულ ობიექტში ლეგალურად ვაჭრობდეს“, – ამბობს ნინოწმინდის მუნიციპალიტეტის მერი ანივარდ მოსოიანი.

ბაზარი ნინოწმინდაში, პუშკინის ქუჩის მიმდებარე აშენდება. საპროექტო დოკუმენტების მიხედვით, ბაზრისთვის განკუთვნილ ტერიტორიაზე მოეწყობა საზოგადოებრივი საპირფარეშო, საწყობი, ხორცის სავაჭრო პავილიონი და გარე შადრევანი. ტენდერში განაცხადების მიღება 27 მარტამდე გაგრძელდება. ბაზრის მშენებლობა ხელშეკრულების გაფორმებიდან ხუთ თვეში დასრულდება.

[ავთო ინასარიძე, ახალციხე]