ბაზრის დირექტორი: ‘ხანძარმა 65 000 ლარამდე გვაზარალა’

ბორჯომში, ჩარხის წყლის აგრარული ბაზარში ხანძარისგან 18 მეწარმე დაზარალდა.

„ბაზარი ძირითადად შენობის პირველ სართულზე, 500 კვადრატულ მეტრზე იყო გაშლილი. აქედან 100 კვადრატული მეტრი დაიწვა, მაგრამ მაღალი სიცხისაგან ინვეტარი და პროდუქტი მთელ სართულზე განადგურდა“, – ამბობს ჩარხის წყლის აგრარული ბაზრის დირექტორი გია მელიქიძე.
შენობაში დამტვრეულია შენობის ფანჯრები, ასევე, ჩამოშლილია ჭერი.

„არ ვიცი, საერთოდ, შესაძლებელი იქნება თუ არა ამ მეწარმეებისთვის მიყენებული ზარალის ანაზღაურება. არადა თუ ვინმე არ დაგვემხარა აქ ბრუნვა არ იქნება და შესაძლოა ბაზარი დაიხუროს კიდეც, წაგებაზე ხათრით არავინ იმუშავებს. ახლა ბაზარი დაკეტილია, აქ მხოლოდ გარემოვაჭრეები მუშაობენ“, – ამბობს მელიქიძე.

ნახანძრალი ბაზარის ტერიტორია ბორჯომის მერიის თანამშრომლებმა უკვე დაათვალიერეს. თვითმმართველობაში ამბობენ, რომ მუნიციპალიტეტის პირველი პირები ბაზრის დირექტორს, ხვალ რვა ივნისს შეხვდებიან: „იქ გადაწყდება ალბათ თუ რითი შეძლებს დაზარალებული მეწარმეების დახმარებას მერია“.

ბორჯომის აგრარულ ბაზარში ხანძარი გუშინ, ექვს ივნისს დილის 05:00 საათზე გაჩნდა. შენობაში ცეცხლი დარაჯმა დაინახა და სახანძრო ჯგუფს გამოუძახა. დირექტორი ვარაუდობს, რომ ხანძარი ელექტროგაყვანილობამ გამოიწვია.

ხანძრის გამომწვევი მიზეზის დადგენა სამართალდამცველებმა უკვე დაიწყეს. შსს–მ საქმეზე ძიება 187–ე მუხლის მორე ნაწილით დაიწყო, რაც ნივთის დაზიანებას, ან განადგურებას გულისხმობს.

ბორჯომის აგრარული ბაზარი 2007 წელს აშენდა და საიჯარო ხელშეკრულებით შპს „საუკუნმშენს“ 2031 წლამდე გადაეცა. როგორც ბაზრის დირექტორი ამბობს, შპს–ს დამფუძნებელი ამ ჟამად საქართველოში არ იმყოფება.

[ლუბა გიორგაძე, ბორჯომი]