ახალქალაქში ნატოს შესახებ საინფორმაციო ცენტრი გაიხსნა

ბიურო ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა დავით ბაქრაძემ და სსიპ „ნატოსა და ევროკავშირის შესახებ საინფორმაციო ცენტრის" დირექტორის მოვალეობის შემსრულებელმა თამარ მედულაშვილმა გახსნეს.

ღონისძიებასთან დაკავშირებით ახალქალაქის საჯარო სკოლების მოსწავლეებმა ქალაქის ცენტრში ფლეშ-მობი მოაწყვეს.

რეგიონული ბიუროს გახსნის შემდეგ სტუმრებმა მომავლის სახლში ხელნაკეთი ნივთების გამოფენა დაათვალიერეს. ასევე, გამგეობის შენობაში ადგილობრივი მუნიციპალიტეტისა და სამოქალაქო საზოგადოების წარმომადგენლებს შეხვდნენ.

შეხვედრაზე საქართველოს ევროპული ინტეგრაციის მიმდინარეობის პროცესზე ისაუბრეს.

„ნატოსა და ევროკავშირის შესახებ საინფორმაციო ცენტრის" წარმომადგენლების განცხადებით, ბიურო სამცხე-ჯავახეთის რეგიონში მცხოვრები მოსახლეობის ნატოსა და ევროკავშირის შესახებ ინფორმირებულობის გაზრდასა და მათი ევროპულ და ევროატლანტიკურ სტრუქტურებში ინტეგრაციის პროცესში აქტიურად ჩართვას შეუწყობს ხელს.












[Sknews.ge]