საქართველოში ნატოს დღეები დაიწყო

ნატოს დღეების ფარგლებში, სამცხე-ჯავახეთში სხვადასხვა აქტივობა განხორციელდება.

19 აპრილს, 14:00 საათზე, ახაციხის მუნიციპალიტეტის მერიაში ადგილობრივი თვითმმართელობის, არასამთავრობო ორგანიზაციების და მედიის წარმომადგენლებისთვის საქართველოს ევროატლანტიკური ინტეგრაციის შესახებ საინფორმაციო შეხვედრაა დაგეგმილი. შეხვედრას სსიპ ნატოსა და ევროკავშირის შესახებ საინფორმაციო ცენტრის დირექტორი ნინო ბოლქვაძე გაუძღვება.

ნატოს დღეებისადმი მიძღვნილი გამოფენა იქნება ახალქალაქის სამხატვრო სკოლაშიც. ღონისძიებაში მონაწილეობას ახალქალაქის საჯარო სკოლებისა და სამხატვრო სკოლის მოსწავლეები მიიღებენ.

გარდა ამისა, ნატოს თემაზე დაგეგმილია არაერთი ლექცია-სემინარი და კონკურსი.

ჩატარდება რაგბის ტურნირი - "დადე ლელო ნატოსთან ერთად", ასევე მედიის წარმომადგენლებისთვის განხორციელდება ტრადიციული პროექტი - "ერთი დღე ჯარში".

ქვეყნის რვა რეგიონში, მათ შორის, ეთნიკური უმცირესობებით დასახლებულ რეგიონებსა და საოკუპაციო ხაზის მიმდებარე სოფლებში, დაგეგმილია საინფორმაციო შეხვედრები აღმასრულებელი ხელისუფლების წარმომადგენლებისა და ექსპერტების მონაწილეობით, კონკურსები, სპორტული აქტივობები და გასართობი ღონისძიებები.

წელს, ნატოს დღეები ნატოსა და ევროკავშირის შესახებ საინფორმაციო ცენტრის ორგანიზებით, საგარეო საქმეთა სამინისტროს მხარდაჭერით და თავდაცვის სამინისტროსთამ, საქართველოში ნატოს სამეკავშირეო ოფისთან და საქართველოში ბულგარეთის საელჩოსთან (ნატოს საკონტაქტო საელჩო) თანამშრომლობით იმართება.

ნატოს დღეები წელს მეთერთმეტედ აღინიშნება და მისი მიზანია ალიანსისა და ნატო-საქართველოს თანამშრომლობის შესახებ საქართველოს მოქალაქეების ინფორმირება. კვირეული ნატო-საქართველოს სახალხო დიპლომატიის ფორუმით დასრულდება.

[sknews.ge]