‘ნაცრის ყრის’ ოთხშაბათი – კათოლიკურ ეკლესიაში დიდმარხვა დაიწყო

დღეს, ექვს მარტს, ადიგენში, არლის კათოლიკურ ეკლესიაში დიდმარხვის პირველი დღის აღსანიშნავად ლიტურგია შესრულდა. წირვა მღვდელმა დარიუშ კომადოვსკიმ აღავლინა.

ქადაგებისას მან დიდმარხვის მნიშვნელობის შესახებ ისაუბრა და აღნიშნა, რომ მარხვა, რომლის დროსაც მორწმუნე უარს ამბობს, რომელიმე მავნე ჩვევაზე, ან გარკვეულ საკვებზე, ორმოცდღიანი პერიოდის მხოლოდ ერთი ნაწილია: „ქართულად ამ პერიოდს „დიდ მარხვას“ ვუწოდებთ და ხაზს ვუსვამთ ერთ–ერთ ასპექტს – მარხვას, თუმცა ეს არის ერთ–ერთი და არა ერთადერთი, რადგან ამ პერიოდში სამი მნიშვნელოვანი გზით შეგვიძლია ვიაროთ: ლოცვით, მარხვითა და მოწყალებით“.

ქადაგების დასრულებისას, მან ტრადიციის მიხედვით ნაცარი აკურთხა. შემდეგ კი ნაკურთხი ნაცრის მცირე ოდენობა, მონანიებისა და მოქცევის ნიშნად მორწუნეებს თავზე დააყარა, სიტყვებით: „მოინანიე და იწამე სახარება“.

ტრადიცია სათავეს მერვე საუკუნიდან იღებს, როცა ცოდვილად შერაცხულ ადამიანებს ჯერ ნაცარს აყრიდნენ, შემდეგ კი ტაძრის გარეთ შეკრებილ ხალხთან საჯარო მონანიებისკენ უბიძგებდნენ. თავდაპირველად, ეს წესი მხოლოდ იმ ადამიანებს ეხებოდათ, რომელთა მიერ ჩადენილი ცოდვების შესახებაც საჯაროდ იყო ცნობილი. მე–11 საუკუნეში კი პაპმა ურბანუს მეორემ იგი ყველა მორწმუნეზე გაავრცელა.

ნაცარი, რომელსაც მორწმუნეებს აყრიან, წინა წლის ბზის ტოტების დაწვის შედეგად მიიღება. იგი სიკვდილისა და ადამიანის არარაობის გაცნობიერების სიმბოლოა.

კათოლიკურ ეკლესიაში დიდმარხვა ორმოცი დღის განმავლობაში გრძელდება. იგი მორწმუნეებს აღდგომის დღესასწაულისთვის ამზადებს. წელს, კათოლიკეები აღდგომას 21 აპრილს იზეიმებენ.



[თაკო ფეიქრიშვილი, ადიგენი]