'ვარდისშეყრა' – ქრისტეს ხორცისა და სისხლის დღესასწაული კათოლიკე ეკლესიაში [Photo/Video]

'ვარდისშეყრა' ქრისტეს ხორცისა და სისხლის დღესასწაულის მესხური სახელწოდებაა. რეგიონში მცხოვრები კათოლიკეები მას სულთმოფენობიდან ათი დღის შემდეგ ზეიმობენ. წელს ეს დღე 31 მაისს აღინიშნა.

დღესასწაული წმინდა წირვასა და საზეიმო მსვლელობას მოიცავს. მისი ერთ–ერთი ატრიბუტი ფერადი ყვავილებია -"ქრისტიანებს გვწამს, რომ ამ დროს, ევქარისტიის მეშვეობით, ცოცხალი ქრისტეა ჩვენს შორის. სწორედ ამიტომ, პატივისცემის ნიშნად, ჩვენ მას გზაზე ყვავილებს ვუფენთ", – ამბობენ მორწმუნეები.

'ვარდისშეყრა' სოფელ არლის კათოლიკურ ტაძარში სადღესასწაულო წირვით დაიწყო. იგი დილის 10:00 საათზე, მღვდელმა დარიუშ კომადოვსკიმ აღავლინა. სასულიერო პირმა, ქადაგებისას, პურისა და ღვინის, ქრისტეს ხორცად და სისხლად გარდაქმნის შესახებ ისაუბრა.



წირვის დასრულების შემდეგ, 'ვარდისშეყრის' მსვლელობა სოფელ არლიდან უდეში გაიმართა. დაახლოებით ოთხ კილომეტრიან გზაზე, მრევლი ოთხჯერ შეჩერდა, საგანგებოდ მომზადებულ ადგილებზე სახარების სხვადასხვა მონაკვეთი წაიკითხეს.



"დღესასწაული მხოლოდ კათოლიკურ ეკლესიაში აღინიშნება. მას მთელი მსოფლიოს კათოლიკეები ვზეიმობთ. წმინდა ზიარების თანხლებით გამოვდივართ ხალხში და ვაღიარებთ ჩვენს რწმენას. მღვდელს, რომელიც წინ მიუძღვის მსვლელობას, მიაქვს ყოვლადწმინდა საიდუმლო, აღმდგარი იესოს სხეული ანუ ის, რასაც ჩვენ ვიღებთ ზიარების სახით", – ამბობს მესხეთის დეკანოზი ზურაბ კაკაჩიშვილი.



ქრისტეს ხორცისა და სისხლის დღესასწაული კათოლკე ეკლესიაში მეცამეტე საუკუნიდან აღინიშნება. როგორც ადგილობრივები ამბობენ, კომუნისტურ პერიოდში, როცა მესხეთის სოფლებში კათოლიკე მღვდლები არ სწირავდნენ, მორწმუნეები 'ვარდისშეყრის' დღესასწაულზე ბუზმარეთის ტაძრის მოსალოცად მიდიოდნენ.




















[თაკო ფეიქრიშვილი, ადიგენი]