„ნაცრის ყრის ოთხშაბათი“– დიდმარხვის პირველი დღე კათოლიკე ეკლესიაში [Photo]

დიდმარხვის პირველ დღეს ანუ „ნაცრის ყრის ოთხშაბათს“ ახალციხის კათოლიკურ სამრევლოში წირვა წინამძღვარმა მამა ფილიპო ალიანმა აღავლინა. მან ტრადიციული რიტუალი – „ნაცრის ყრა“ შეასრულა და მორწმუნეებს ორმოცი დღის განმავლობაში ლოცვის, მარხვისა და გულმოწყალებისკენ მოუწოდა.

ისევე როგორც ახალციხეში, დღეს 1 მარტს „ნაცრის ყრის ოთხშაბათის“ რიტუალი ყველა კათოლიკურ ტაძარში შესრულდა. ტრადიციის თანახმად ლიტურიგიისას მღვდელი მონანიებისა და მოქცევის ნიშნად, მორწმუნეებს თავზე მცირეოდენ ნაცარს აყრის და ამბობს: „გახსოვდეს, რომ მტვერი ხარ და მტვრად იქცევი“ ( ან „მოინანიე და იწამე სახარება“ ).

ტრადიცია სათავეს მე–8 საუკუნიდან იღებს, როცა ცოდვილად შერაცხულ ადამიანებს ჯერ ნაცარს აყრიდნენ, შემდეგ კი ტაძრის გარეთ შეკრებილ ხალხთან საჯარო მონანიებისკენ უბიძგებდნენ. თავდაპირველად, ეს წესი მხოლოდ იმ ადამიანებს ეხებოდათ, რომლების მიერ ჩადენილი ცოდვების შესახებაც საჯაროდ იყო ცნობილი. მე–11 საუკუნეში კი პაპმა ურბანუს II იგი ყველა მორწმუნეზე გაავრცელა.
ნაცარი, რომელსაც მორწმუნეებს აყრიან, წინა წლის ბზის ტოტების დაწვის შედეგად მიიღება.იგი სიკვდილისა და ადამიანის არარაობის გაცნობიერების სიმბოლოა.

დიდმარხვის ორმოც დღიანი პერიოდი კათოლიკეებისათვის, "ლოცვას, მარხვასა და გულმოწყალებას" მოიცავს. როგორც მოძღვრები განმარტავენ, ამ პერიოდში მორწმუნეებმა უნდა განაახლონ ნათლობისას მიღებული მადლი და იზრუნონ ცოდვების მონანიებაზე.

გარდა ამისა, კათოლიკე ეკლესიაში, მარხვა მხოლოდ საკვების "არ მიღებას" არ გულისხმობს. მორწმუნე, ქრისტეს აღდგომისათვის, სულიერად უნდა მოემზადოს. შესაძლებელია უარი არა მხოლოდ საკვებზე, არამედ საყვარელ ჩვევაზე, ან ქცევაზეც თქვას. აქვე აუცილებელია მარხულმა ამ პერიოდში გულმოწყალება გამოიჩინოს და ილოცოს.

დიდმარხვა მოსამზადებელი პერიოდია ქრისტეს ბრწყინვალე აღდგომისათვის, რომელსაც წელს, 16 აპრილს, კათოლიკე და მართლმადიდებელი ეკლესიები ერთად აღნიშნავენ.


















[თაკო ფექირიშვილი, ახალციხე]