კათოლიკეებისთვის დიდმარხვა დაიწყო

ფოტო:არქივი

კათოლიკურ ეკლესიაში დიდმარხვა დღეს, 26 თებერვალს დაიწყო და 12 აპრილს, აღდგომის დღესასწაულზე დასრულდება. ორმოცდღიანი პერიოდის პირველ დღეს საქართველოში მოქმედ ყველა ტაძარში წირვა აღევლინება და სიმბოლური რიტუალი „ნაცრის ყრა“ შესრულდება.

კათოლიკე ეკლესიაში, მარხვა მხოლოდ საკვების "არ მიღებას" არ გულისხმობს. მორწმუნე, ქრისტეს აღდგომისათვის, სულიერად უნდა მოემზადოს. შესაძლებელია უარი არა მხოლოდ საკვებზე, არამედ საყვარელ ჩვევაზე, ან ქცევაზეც თქვას.

თუმცა მარხვა ორმოცდღეულის მხოლოდ ერთი ნაწილია, ამ პერიოდში მორწმუნე კათოლიკეებისთვის დიდი მნიშვნელობა ენიჭება ლოცვასა და მოწყალებასაც.

არსებობს პირველი დღის რიტუალი, რომელიც წირვის დროს აღევლინება და „ნაცრის ყრის“ სახელით არის ცნობილი.

ტრადიციის მიხედვით, მორწმუნეებს ტაძარში წინა წლის ბზობის დღესასწაულისას დარიგებული ბზა მიაქვთ. ტოტების დაწვის შედეგად მიღებულ ნაცარს მოძღვარი აკურთხებს და მცირე ოდენობას, მონანიებისა და მოქცევის ნიშნად მორწუნეებს თავზე აყრის, სიტყვებით: „გახსოვდეს, რომ მტვერი ხარ და მტვრად იქცევი“ ან „მოინანიე და იწამე სახარება“.

ტრადიცია სათავეს მერვე საუკუნიდან იღებს, როცა ცოდვილად შერაცხულ ადამიანებს ჯერ ნაცარს აყრიდნენ, შემდეგ კი ტაძრის გარეთ შეკრებილ ხალხთან საჯარო მონანიებისკენ უბიძგებდნენ. თავდაპირველად, ეს წესი მხოლოდ იმ ადამიანებს ეხებოდათ, რომელთა მიერ ჩადენილი ცოდვების შესახებაც საჯაროდ იყო ცნობილი. მე–11 საუკუნეში კი პაპმა ურბანუს მეორემ იგი ყველა მორწმუნეზე გაავრცელა.

ქრისტიანულ სარწმუნოებაში, დიდმარხვა მოსამზადებელი პერიოდია იესო ქრისტეს აღდგომის დღესასწაულისათვის.

ამავე თემაზე - ნაცრის ყრა, ჯვრის გზა და ოცდაცამეტიანი – დიდმარხვის კათოლიკური ტრადიციები

[თაკო ფეიქრიშვილი, ახალციხე]