კათოლიკურ სამრევლოში 'ნაცრისყრის ოთხშაბათის' ლიტურგია შესრულდა

დღეს, 14 თებერვალს, ახალციხის კათოლიკურ სამრევლოში „ნაცრისყრის ოთხშაბათის“ ლიტურგია შესრულდა. რაბათის სავარდის სახელობის ტაძრის წინამძღვარმა ფილიპო ალიანმა, ტრადიციულად, მრევლის წევრებს თავზე მცირეოდენი ნაცარი დააყარა, სიტყვებით: „გახსოვდეს, რომ მტვერი ხარ და მტვრად იქცევი“.

ქადაგებისას მან მარხვის მნიშვნელობაზე ისაუბრა და აღნიშნა, რომ კათოლიკე ეკლესია ორმოცდღიანი პერიოდის განმავლობაში მორწმუნეებს არა მხოლოდ მარხვის, არამედ ლოცვისა და გულმოწყალებისკენაც მოუწოდებს – „ლოცვა გვეხმარება ღმერთთან დასაახლოებლად, მარხვა – ჩვები ნებისყოფის გამოცდისა და ამქვეყნიური სიამის დათმობის სწავლებისთვის, ხოლო გულმოწყალება – გაჭირვებულ ძმათა დასახმარებლად“, – აღნიშნა ქადაგებისას წინამძღვარმა.

ნაცარი, რომელსაც მორწმუნეებს აყრიან, წინა წლის ბზის ტოტების დაწვის შედეგად მიიღება.იგი სიკვდილისა და ადამიანის არარაობის გაცნობიერების სიმბოლოა.

კათოლიკურ ეკლესიაში, ნაცრისყრის ტრადიცია სათავეს მე–8 საუკუნიდან იღებს, როცა ცოდვილად შერაცხულ ადამიანებს ჯერ ნაცარს აყრიდნენ, შემდეგ კი ტაძრის გარეთ შეკრებილ ხალხთან საჯარო მონანიებისკენ უბიძგებდნენ. თავდაპირველად, ეს წესი მხოლოდ იმ ადამიანებს ეხებოდათ, რომლების მიერ ჩადენილი ცოდვების შესახებაც საჯაროდ იყო ცნობილი. მე–11 საუკუნეში კი პაპმა ურბანუს II იგი ყველა მორწმუნეზე გაავრცელა.

კათოლიკე ეკლესიაში, მარხვა მხოლოდ საკვების "არ მიღებას" არ გულისხმობს. მორწმუნე, ქრისტეს აღდგომისათვის, სულიერად უნდა მოემზადოს. შესაძლებელია უარი არა მხოლოდ საკვებზე, არამედ საყვარელ ჩვევაზე, ან ქცევაზეც თქვას.

დიდმარხვა კათოლიკე ეკლესიაში ქრისტეს აღდგომის დღესასწაულზე დასრულდება. წელს, აღდგომას კათოლიკეები 1–ელ აპრილს იზეიმებენ.

















[თაკო ფეიქრიშვილი, ახალციხე]