ბაკურიანში სრიალის დროს 22 წლის მოთხილამურე დაშავდა

შემთხვევა ექვს თებერვალს დილით მოხდა, როგორც დაშავებულის მამა ალე ბაკაევი გვიყვება, მისი შვილი სავარაუდოდ ყინულზე მოცურდა, რის გამოც სხეულის დაზიანებები მიიღო: „გადავრჩით, ექიმებმა გვითხრეს, რომ მის სიცოცხლეს საფრთხე არ ემუქრება. ხუთი წლის იყო პირველად თხილამურებზე რომ დადგა. საქართველოს ნაკრებშია, ბევრი ჯილდო და პირველი ადგილი აქვს მიღებული“.

დაშავებული სოსო ბაკაევი გორის სამედიცინო დაწესებულება „გორიმედში“ მკურნალობს. მას სასწრაფო ოპერაცია ჩაუტარდა.

„პაციენტს აღენიშნებოდა კომბინირებული პოლიტრავმა, ნეკნების მრავლობითი მოტეხილობა ფილტვის დაჟეჟილობით, ასევე, წვივის ძვლის მრავლობითი მოტეხილობა. მას ჩაუტარდა მარჯვენა ფილტვის დრენირება და წვივის ძვლების ოსტეოსინთეზი. ამჟამად პაციენტის მდგომარეობა დამაკმაყოფილებელია“, - განაცხადა interpressnews.ge–სთან „გორმედის“ ქსელის ცენტრალური საავადმყოფოს რეანიმაციული დეპარტამენტის ხელმძღვანელმა დავით ყაზაიშვილმა.

სოსო ბაკაევი ბაკურიანში ცხოვრობს, იგი „ევროპის უნივერსიტეტის“ მეოთხე კურსის სტუდენტია.

ზამთრის 29-ე საერთაშორისო უნივერსიადა კრასნოიარსკში 2–12 მარტს ჩატარდება, სწორედ აქ გეგმავდა მონაწილეობის მიღებას ბაკურიანელი მოთხილამურე.

[თინათინ ზაზაძე, ბორჯომი]