სოფელ ხეოთთან ავარიისას დაშავებულ კაცს ოპერაცია გაუკეთეს

42 წლის მამაკაცი მკურნალობას ახალციხის რეფერალურ ჰოსპიტალში გადის.

"ქვედა კიდურზე წვივის მრავლობითი მოტეხილობა ჰქონდა. მდგომარეობა დასტაბილურდა, თუმცა ტრამვა სერიოზული იყო და მალე ვერ გავწერთ", – აცხადებენ ახალციხის რეფერალურ ჰოსპიტალში.

შეგახსენებთ, რომ სოფელ ხეოთთან ავტოსაგზაო შემთხვევა 20 აპრილს 02:00 საათზე მოხდა. როგორც ადგილობრივები ამბობენ, "ოპელის" მარკის მსუბუქი ავტომობილი, სოფელ ხეოთიდან ახალციხის მიმართულებით მოძრაობდა, მძღოლმა საჭე ვერ დაიმორჩილა და მოსახვევში ამოტრიალდა. მანქანაში სამი ადამიანი იმყოფებოდა. შემთხვევის შედეგად, მძღოლის გვერდით მჯდომი 30 წლის მამაკაცი გარდაიცვალა, მძღოლმა ქვედა კიდურზე მრავლობითი დაზიანებები მიიღო, უკან მჯდომი 16 წლამდე ბიჭი კი უვნებელი გადარჩა.

შსს–მ მომხდარზე ძიება, სსკ–ს 276–ე მუხლის, პირველი ნაწილით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.

[ლუბა გიორგაძე, ახალციხე]