ბორჯომი–თბილისის მატარებლის და მანქანის შეჯახების შედეგად 60 წლამდე კაცი დაშავდა

შემთხვევა ხაშურში, სოფელ ტეზერის მოსაცდელთან მოხდა. მანქანაში, რომელიც თბილისის მიმართულებით მოძრავ მატარებელს შეეჯახა, მხოლოდ მძღოლი იჯდა. იგი სასწრაფო სამედიცინო დახმარების ბრიგადამ ხაშურის საავადმყოფოში გადაიყვანა. სამედიცინო დაწესებულებაში აცხადებენ, რომ ამ ეტაპზე მის სიცოცხლეს საფრთხე არ ემუქრება.

„მკურნალობას ჩვენს კლინიკაში გადის, ჩაუტარდა კვლევები, ნეკნები აქვს მოტეხილი. მისი მდგომარეობა სტაბილურად მძიმეა, პაციენტი კონტაქტურია. შეიძლება ფილტვის ღრუს დრენირება დასჭირდეს“, – განაცხადა სამედიცინო დაწესებულების კლინიკურმა მენეჯერმა კობა გელაშვილმა.

შსს– ინფორმაციით გამოძიება 275 მუხლის პირველი ნაწილით დაიწყო, რაც სარკინიგზო ავტოტრანსპორტის მოძრაობის უსაფრთხოების და ექსპლუატაციის წესის დარღვევას გულისხმობს, რამაც ადამიანის ჯანმრთელობის დაზიანება გამოიწვია.

საგამოძიებო მოქმედებების მიმდინარეობის გამო სარკინიგზო მიმოსვლა დროებით შეჩერდა და ამ დროისთვის აღდგენილია.

[თინათინ ზაზაძე, ახალციხე]