ერთი გარდაცვლილი და სამი დაშავებული - ავარია ახალციხე-აბასთუმნის გზაზე

ავტოავარია 15 აპრილს, დაახლოებით 23:00 საათზე მოხდა. შსს–ს ინფორმაციით, "მძღოლმა საჭე ვერ დაიმორჩილა, გზის სავალი ნაწილიდან გადავიდა და შეჯახებაც ამის გამო მოხდა".

ავარიისას, მანქანაში მყოფი ოთხივე ადამიანი დაშავდა. მათგან ერთი, 62 წლის, ადიგენის მცხოვრები, კლინიკა "იმედში" დილის 04:00 საათზე გარდაიცვალა. სამედიცინო დაწესებულებაში განმარტავენ, რომ პაციენტს დაზიანებები გულ–მკერდის არეში აღენიშნებოდა, ჰქონდა მრავლობითი მოტეხილობა – "მას შემდეგ, რაც ჩაუტარდა ყველა საჭირო გამოკვლევა, გადაწყდა, რომ იგი თბილისში, სპეციალიზებულ კლინიკაში გადაგვეყვანა. ამისათვის გამოვიძახეთ კატასტროფის ბრიგადაც, რომელიც დროულად მოვიდა, თუმცა პაციენტის ტრანსპორტირება შეუძლებელი იყო", – განმარტავენ კლინიკა "იმედში".

სამი დაშავებულიდან, ერთი უკვე გაწერეს, ერთი, რომელსაც ზედა ყბის მოტეხილობა აღენიშნებოდა, თბილისში გადაიყვანეს, ერთი კი ახალციხეში განაგრძობს მკურნალობას. მას თავის ტვინის შერყევა აქვს. ექიმების განმარტებით, მისი მდგომარეობა სტაბილურია.

შსს–ს ინფორმაციით, საქმეზე გამოძიება სისხლის სამართლის კოდექსის 276–ე მუხლით მიმდინარეობს, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.

[თაკო ფეიქრიშვილი, ახალციხე]