H1N1 – რა მდგომარეობაა სამცხე–ჯავახეთის საავადმყოფოებში

რეგიონის მასშტაბით გრიპის ვირუსით ინფიცირებულთა მიმართვიანობა განსაკუთრებით აპინძასა და ბორჯომში გაიზარდა.

ასპინძის საავამდყოფოში გრიპის ვირუსზე მკურნალობას ამჟამად ხუთი ადამიანი გადის. როგორც სამედიცინო დაწესებულებაში აცხადებენ, ყველა მათგანის მდგომარეობა დამაკმაყოფილებელია: „ბოლო სამი დღის განმავლობაში პაციენტების მომართვიანობამ საგრძნობლად იმატა. საავადმყოფო „ტამიფლუთი“ მომარაგებულია და სტაციონარში მკურნალ პაციენტებზე მედიკამენტი უკვე გაიცა“, – ამბობს ასპინძის საავადმყოფოს დირექტორი მანანა ცინაძე.

გასულ თვესთან შედარებით გასამმაგდა პაციენტების მიმართვიანობა ბორჯომის საავადმყოფოშიც. დირექტორის ირაკლი დიასამიძის თქმით, ახლა აქ მკურნალობას ვირუსით ინფიცირებული ოთხი პაციენტი გადის.

გრიპის ვირუსით მაღალი მიმართვიანობის გამო, პაციენტებთან მნახველების რაოდენობა ერთი კვირაა შეზღუდა ახალციხის რეფერალურმა ჰოსპიტალმა. ვირუსზე ამ დროისათვის ჰოსპიტალში ორი პაციენტი მკურნალობს და ორივე მათგანის მდგომარეობა დამაკმაყოფილებელია.

„სტაციონარში მოთავსება მეტს არ დასჭირვებია, თუმცა მომართვიანობა მაღალია, რადგან ხალხში პანიკაა, რომ „ღორის გრიპია“ გავრცელებული. გამოკვლევების შედეგად დგინდება, რომ მათ საგანგაშო მდგომარეობა არ აქვთ და ამბულატორიულადაც შესაძლებელია მკურნალობა“, – ამბობს ახალციხის რეფერალური ჰოსპიტალის დირექტორი ხათუნა კეკელაშვილი.

დეკემბრიდან მნახველთა რაოდენობა შეზღუდა ახალციხეში კლინიკა „იმედმაც“. საავადმყოფოში ამ დროისათვის გრიპის ვირუსით არავინ მკურნალობს, თუმცა მიმართვიანობა გაზრდილია.

გრიპის ვირუსით ინფიცირებულები არ ჰყავს ახალქლაქის, ნინოწმინდისა და ადიგენის სამედიცინო დაწესებულებებსაც, თუმცა ისევე როგორც რეგიონის სხვა კლინიკებში, მიმართვიანობა აქაც გაზრდილია.

სამცხე–ჯავახეთში მოქმედ ყველა საავადმყოფოებში აცხადებენ, რომ გრიპის საწინააღმდეგო მედიკამენტებით მომარაგებულები არიან.

რაც შეეხება რეგიონის საზოგადოებრივი ჯანდაცვის ცენტრებს, ყველა მათგანი ვირუსის საწინააღმდეგო მედიკამენტ „ტამიფლუს“ ფორმა ასის საფუძველზე, ბავშვებზე, ორსულებზე, პენსიონრებსა და სოციალურად დაუცველებზე უფასოდ გასცემს.

ჯანდაცვის ცენტრებში აცხადებენ, რომ ამ დრომდე რეგიონში „ღორის გრიპის“ შემთხვევა არ დაფიქსირებულა.

საქართველოში H1N1 ე.წ ღორის გრიპის 158 შემთხვევა დაფიქსირად, აქედან 10 ფატალურად დასრულდა. გარდაცვლილებს შორის ერთ–ერთი, 25 წლის ახალგაზრდა სოფელ აბასთუმნიდან იყო, იგი ბოლო დროს ქალაქ რუსთავში ცხოვრობდა.

[ლუბა გიორგაძე, ახალციხე]