ახალციხეში გრიპის საწინააღმდეგო მედიკამენტი ‘ტამიფლუ’ არ იყიდება

ახალციხის სამედიცინო დაწესებულებებში გრიპზე მიმართვიანობა დეკემბერთან შედარებით შემცირებულია, თუმცა ვირუსის გამო კლინიკებში პაციენტები მკურნალობას ჯერ ისევ გადიან. საავადმყოფოებში ამბობენ, რომ ამ დრომდე ლაბორატორიულად ახალციხეში H1N1 ანუ ე.წ „ღორის გრიპი“ არ დაფიქსირებულა.

„ამ წუთში ჩვენთან ვირუსით ოთხი პაცინეტი წევს, სამი მცირეწლოვანია, ერთი კი მოზარდი. მოზარდის მდგომარეობა ცოტა მძიმეა, თუმცა რეანიმაციაში გადაყვანას არ საჭიროებს. პატარები შედარებით უკეთ არიან“, – გვითხრეს ახალციხის რეფერალურ ჰოსპიტალში.
უკვე ყველა პაციენტი გაეწერა „იმედის“ კლინიკიდან.

ორივე საავადმყოფოში აცხადებენ, რომ გრიპის ვირუსით დაავადებულთათვის ყველა საჭირო მედიკამენტი აქვთ.

რაც შეეხება აფთიაქებს, ამ დროისთვის ახალციხეში, არცერთ სააფთიაქო ქსელში გრიპის საწინააღმდეგო წამალი „ტამიფლუ“ არ იყიდება.

„დღესაც იყვნენ შემოსულები და იკითხეს, თუმცა არ გვაქვს. მასიურად არა, მაგრამ მედიკამენტზე მოთხოვნა არის“, – გვითხრეს PSP-ში.

“ავერსში” ამბობენ, რომ წამლების შემოტანის დღე ოთხშაბათია და შესაძლოა აღნიშნული მედიკამენტი სწორედ ამ დღეს შემოიტანონ.
„არ ვიცით „ტამიფლუს“ როდის შემოიტანენ“ – აცხადებენ „ფარმადეპოსა“ და „ჯი–პი–სი–ში“.

„ტამიფლუ“ ჯანმრთელობისა და სოციალური დაცვის სამინისტრომ ოთხ სააფთიაქო ქსელს გადასცა. საგანგებო სიტუაციების კოორდინაციისა და გადაუდებელი დახმარების ცენტრის დირექტორის მოადგილე დავით ტორუა ამბობს, რომ მედიკამენტის რაოდენობა 800 ერთეულ კოლოფს შეადგენს. მისივე თქმით, პრეპარატი იმ რეგიონებში ნაწილდება, სადაც შეიძლება, ისევ დეფიციტი გაჩნდეს.

„სამხრეთის კარიბჭეს“ ჯანდაცვის სამინისტროში განუცხადეს, რომ მედიკამენტი აფთიაქებზე მოთხოვნის მიხედვით გაიცემა: „იმ შემთხვევაში, თუ სააფთიაქო ქსელი მოგვმართავს, რომ მედიკამენტზე მოთხოვნა არის, ჩვენ გადავცემთ. ამ დროისათვის სამცხე–ჯავახეთიდან არ მოუმართავთ“.
ასევე, ჯანდაცვისი სამინისტროში გვითხრეს, რომ „ქვეყნის მასშტაბით, საზოგადოებრივი ჯანდაცვის ცენტრებში შესაბამისი მარაგი არსებობს, რომელიც ბავშვებზე, ორსულებზე, პენსიონერებზე და სოციალურად დაუცველებზე უფასოდ გაიცემა“.

რა მარაგი აქვს ახალციხის ჯანდაცვის სამსახურს, ან მიმართეს თუ არა მას გაცემის მოთხოვნით მოქალაქეებმა უცნობია. დღეს, ექვს იანვარს, ჯანდაცვის სამსახურის ხელმძღვანელმა ფატი ხაბულიანმა „სამხრეთის კარიბჭის“ სატელეფონო ზარებს არ უპასუხა.

ოთხი იანვრის მონაცემებით, საქართველოში, ე.წ. ღორის გრიპით სულ რვა ადამიანი გარდაიცვალა.

[ლუბა გიორგაძე, ახალციხე]