გრიპის ვირუსით მერვე ადამიანი გარდაიცვალა

მიუხედავად ამ ციფრისა, დაავადებათა კონტროლის ეროვნული ცენტრში აცხადებენ, რომ წინა კვირებთან შედარებით, ავადობისა და ჰოსპიტალიზაციის მაჩვენებელმა იკლო.

"მესამე კვირასთან შედარებით, მეოთხე კვირაში გვაქვს ავადობის ტემპის შემცირება, ასევე ჰოსპიტალიზაციის ტემპის შემცირება. სამწუხაროდ გვაქვს მერვე შემთხვევა გარდაცვალების და ეს შემთხვევა დაკავშირებულია სამედიცინო დაწესებულებაში დაგვიანებით მიმართვასთან. რეკომენდაცია იქნება, რომ გრიპის სიმპტომების არსებობის შემთხვევაში, დროულად მიმართეთ საავადმყოფოს", - განაცხადა ამირან გამყრელიძემ.

დაავადებათა კონტროლის ეროვნული ცენტრის ინფორმაციით, 2016 წლის მე-4 კალენდარული კვირის მდგომარეობით, გრიპის გავრცელების ინტენსივობა საქართველოში ეპიდემიოლოგიურ ზღურბლს არ აჭარბებს და შეადგენს 357.6-ს 100 000 მოსახლეზე. ხოლო გრიპის გავრცელების ეპიდემიური ზღურბლია 100 000 მოსახლეზე 450-500 შემთხვევა.

როგორც დაავადებათა კონტროლის ეროვნულ ცენტრში აცხადებენ, 2015-16 წლის გრიპის სეზონზე (2015 წლის მე-40 კალენდარული კვირიდან) საქართველოში სულ ლაბორატორიულად გამოვლენილია გრიპის 186 ვირუსი, მათ შორის 179 – A/H1p და 7 - A/H3. ლეტალურად დასრულდა 8 შემთხვევა, მ.შ. 7- A/H1p და 1- A/H3 (პირველი გამოყოფა - 2015 წლის 49-ე კვირაში). გრიპის სხვა ტიპის ვირუსების ცირკულაცია არ გამოვლენილა.

[sknews.ge]