დაავადებათა კონტროლის ცენტრი: ვირუსების პიკი გადავლილია

დაავადებათა კონტროლის ეროვნული ცენტრის ხელმძღვანელის ცნობით, ამ დროისთვის არსებული მონაცემებით H1N1-ის, ე.წ. ღორის გრიპის ვირუსით 15 ადამიანი გარდაიცვალა, ხოლო H3N2-ის ვირუსით - ერთი პირი. ძირითადი მიზეზი იყო დაგვიანებული მიმართვიანობა

როგორც ამირან გამყრელიძემ ჟურნალისტებს განუცხადა, გრიპის ვირუსის მიმართვიანობა ბოლო პერიოდის განმავლობაში შემცირებულია, თუმცა მისი ვარაუდით, თებერვალში გრიპის შემთხვევები კიდევ იქნება.

დაავადებათა კონტროლის ეროვნული ცენტრი მოსახლეობას რეკომენდაციებს აძლევს და მოუწოდებს გრიპის პირველადი სიმპტომების გამოვლენის შემთხვევაში დროულად მიმართონ ექიმს.

„გრიპის ვირუსის პიკი იყო მიმდინარე წლის მეოთხე კვირა, როცა 100 000 მოსახლეზე 357დადასტურებული შემთხვევა გვქონდა. მეხუთე კვირაში დაიწია მაჩვენებელმა და უკვე100 000 მოსახლეზე 310 შემთხვევა დაფიქსირდა. რაც შეეხება მეექვსე კვირას, უკვე დაფიქსირებულია 284 შემთხვევა. სტაციონარში მიმართვიანობა შემცირებულია, თუმცა ეს არ გვაძლევს დამშვიდების საფუძველს. თებერვალში გრიპის შემთხვევები კიდევ იქნება“, – ამბობს ამირან გამყრელიძე.

დაავადებათა კონტროლის ცენტრი მოქალაქეებს ურჩევს, გრიპის საწყისი სიმპტომების შემთხვევაში აუცილებლად მიმართონ ოჯახის ექიმს, ან სამედიცინო დაწესებულებას

„ადრეულ ეტაპზე დაწყებული მკურნალობა გამოჯანმრთელების გარანტიაა. ყველა გარდაცვალების შემთხვევა სწორედ დაგვიანებულმა მკურნალობამ განაპირობა“, – განაცხადა ამირან გამყრელიძემ.

[ნინო ნარიმანიშვილი, ახალციხე]