ვის დაიცავს ახალი ორგანიზაცია?

"ადამიანის უფლებათა საყოველთაო დეკლარაციისათვის“, - ასე ჰქვია ორგანიზაციას, რომელიც თბილისში, მიმდინარე წლის 17 აპრილს დაფუძნდა. დღეს კი ორგანიზაციამ სამცხე-ჯავახეთის წარმომადგენლოება დაასახელა.

ორგანიზაციაში ამბობენ, რომ როგორც სახელწოდებიდანაც ჩანს, მათი ორგანიზაცია 1948 წლის 10 დეკემბერს გაერთიანებული ერების ორგანიზაციის მიერ მიღებულ „ადამიანის უფლებათა საყოველთაო დეკლარაციას“ ეფუძნება და ისინი მზად არიან დახმარება გაუწიონ ყველა იმ ადამიანს, ვინც ფიქრობს, რომ მისი უფლებები ილახება.

„ეს დეკლარაცია დაცული რომ ყოფილიყო, არ მოხდებოდა ისეთი სახის უბედურებები საქართველოში როგორიც იყო 9 აპრილი და ამდენი ტრაგედია. ჩვენ შევეცდებით დავეხმაროთ ხალხს და ხელი შეუშალოთ ყველანაირ სიბინძურეს“, - ამბობს ორგანიზაციის სამცხე-ჯავახეთის რეგიონის კორდინატორი დავით ბერიძე.

მისი განმარტებით, სამომავლოდ აპირებენ ისეთი ხალხის დახმარებას, ვისაც უკანონოდ ჩამოერთვა ქონება, ბიზნესი, მიწა და ასე შემდეგ.

ორგანიზაცია ოფისის გახსნას სამცხე-ჯავახეთის ექვსივე მუნიციპალიტეტში გეგმავს.

„ამ ეტაპზე დაინიშნენ წარმომადგენლები ახალციხესა და ასპინძაში. ასპინძაში ხელმძღვანელი იქნება ნუგზარ ზაქაიძე. ჯერჯერობით სხვაგან არ დაგვინიშნავს, ნელ-ნელა ყველგან დავნიშნავთ. უახლოეს მომავალში გვექნება ოფისები და კორდინატებს გავაგებინებთ ყველას“, - ამბობს ბერიძე.

ასპინძის ოფისის იურისტის თამარ გიორგაძის თქმით, პირველი, რასაც გააკეთებენ, მოსახლეობას „ადამიანის უფლებათა საყოველთაო დეკლარაციას“ გააცნობენ.

[ნუკა სტეფნაძე, ახალციხე]