შსს: ახალქალაქში დაშავებული ამბობს, რომ დაზიანება დაცემის შედეგად მიიღო

როგორც ახალქალაქის რეფერაული საავადმყოფოს ექიმი, ასევე, შინაგან საქმეთა სამინისტროც აცხადებს, რომ ახალქალაქში დაშავებულს დაზიანებები ჩხუბისა და დაპირისპირების გამო არ მიუღია.

"გამოკთხვისას განაცხადა, რომ დაუსრიალდა ფეხი, დაარტყა თავი და დაზიანებები ამ დროს მიიღო. კითხვაზე, ვინმეს ზემოქმედების გამო ხომ არ ამბობს ამ ვერსიას, მან გვითხრა რომ არა და ეს კატეგორიულად უარყო. გამოკითხვას ესწრებოდა თარჯიმანი", – განუცხადეს "სამხრეთის კარიბჭეს" შსს–ში.

უწყებაში ამბობენ, რომ დაზარალებულის ვერსიის სისწორის დასადგენად გამოძიება გრძელდება და მას სასამართლო-სამედიცინო ექსპერტიზა ჩაუტარდება.

განსხვავებულ ვერსიებზე საუბრობენ ახალქალაქში "ნაციონალური მოძრაობისა" და "ქართული ოცნების" წარმომადგენლები.

ახალქალაქში ენმ–ს რაიონული ორგანიზაციის ხელმძღვანელი აშოტ რაისიანი "სამხრეთის კარიბჭესთან" სატელეფონო საუბარში ირწმუნება, რომ რემიკ პოღოსიანი მათი მხარდამჭერია და "ოცნების" აქტივისტები მას ფიზიკურად ამის გამო გაუსწორდნენ: "უთხრეს რატომ უჭერ მხარს აშოტას და ოპოზიციასო".

ახალქალაქში სალომე ზურაბიშვილის შტაბის ხელმძღვანელი და საკრებულოს თავმჯდომარე ნაირი ირიციანი დაპირისპირების ფაქტს ადასტურებს, თუმცა, პოლიტიკურ მოტივს კატეგორიულად უარყოფს: „ფეხბურთში იყო ჩემპიონატი. ერთი ქალაქის და ერთი სოფლის გუნდი მონაწილეობდა. თამაშის დასრულებამდე ხუთი წუთი იყო დარჩენილი რომ გუნდებმა ერთმანეთში რაღაცაზე კამათი დაიწყეს. აქ არაფერ შუაშია „ნაციონალური მოძრაობა“, უბრალოდ ახალგაზრდები რაღაცაზე შელაპარაკდნენ“.

გაერთიანებული ოპოზიციის შტაბის უფროსი, გიორგი ვაშაძე აცხადებს, რომ "პოღოსიანს "ოცნების" დეპუტატის ენზელ მკოიანის კრიმინალური დაჯგუფების წარმომადგენლებმა სცემეს", ამიტომ მის მოსანახულებლად ამ წუთებში თბილისიდან ახალქალაქში "ნაციონალური მოძრაობის" ერთ–ერთი ლიდერი პეტრე ცისკარიშვილი მიემგზავრება.

შეგახსენებთ, რომ შემთხვევა, დღეს, შვიდ ნოემბერს, დღის მეორე ნახევარში, სოფელ ჩანდურაში მოხდა.

შინაგან საქმეთა სამინისტრო მომხდარს სისხლის სამართლის კოდექსის 126-ე მუხლით იძიებს, რაც ცემას გულისხმობს.

[sknews.ge]