ახალქალაქში დაშავებულს პეტრე ცისკარიშვილი მოინახულებს

გაერთიანებული ოპოზიციის საარჩევნო შტაბის ხელმძღვანელის გიორგი ვაშაძის განცხადებით, საპრეზიდენტო კანდიდატი გრიგოლ ვაშაძე ევროპაში იმყოფება, ამიტომ დაშავებულის მოსანახულებლად პარტიის ერთ–ერთი ლიდერი პეტრე ცისკარიშვილი გაემგზავრა.

„სამწუხაროდ, ენზელ მკოიანის კრიმინალური დაჯგუფება აგრძელებს დანაშაულს. ერთის მხრივ ხელისუფლება სპეკულირებს შვიდი ნოემბრით და საუბრობს იმაზე თუ რამდენად შემაშფოთებელი იყო მათთვის ეს დღე და მეორეს მხრივ, თვითონ სცემენ ადამიანებს შვიდ ნოემბერს. ეს იმის ბრალია, რომ ჩვენი წარმომადგენლების ცემის ფაქტზე ბრალდებულები 3 000–ლარიანი გირაოთი გამოუშვეს სასამართლო დარბაზიდან“,– აცხადებს გიორგი ვაშაძე.

ახალქალაქის რეფერალურ ჰოსპიტალში რაიონული სამმართველოს თანამშრომლებმა დაშავებულის გამოკითხვა დაიწყეს.

როგორც ახალქალაქში ენმ–ს რაიონული ორგანიზაციის ხელმძღვანელი აშოტ რაისიანი "სამხრეთის კარიბჭესთან" ამბობს, მათ წარმომადგენელს რემიკ პოღოსიანს "ოცნების" აქტივისტები ფიზიკურად გაუსწორდნენ. მიზეზი კი პოლიტიკური მოტივი იყო: "რატომ უჭერ მხარს აშოტას და ოპოზიციასო".

ახალქალაქში სალომე ზურაბიშვილის შტაბის ხელმძღვანელი და საკრებულოს თავმჯდომარე ნაირი ირიციანი დაპირისპირების ფაქტს ადასტურებს, თუმცა, პოლიტიკურ მოტივს კატეგორიულად უარყოფს: „ფეხბურთში იყო ჩემპიონატი. ერთი ქალაქის და ერთი სოფლის გუნდი მონაწილეობდა. თამაშის დასრულებამდე ხუთი წუთი იყო დარჩენილი რომ გუნდებმა ერთმანეთში რაღაცაზე კამათი დაიწყეს. აქ არაფერ შუაშია „ნაციონალური მოძრაობა“, უბრალოდ ახალგაზრდები რაღაცაზე შელაპარაკდნენ“.

შინაგან საქმეთა სამინისტრო მომხდარს სისხლის სამართლის კოდექსის 126-ე მუხლით იძიებს, რაც ცემას გულისხმობს.

[sknews.ge]